Nizana ZMC Laboratory-a sample endik 302 zingah mipa pakhat leh hmeichhia pakhatin Covid-19 an kai tih hmuh chhuah a ni a, an pahnih hian Aizawl District mi ve ve, tunhnaia Delhi atanga lo haw, quarantine lai an ni a. Covid-19 lan chhuah dan anga dam lohna la nei lo ve ve an ni.
Zonet thudawn danin pakhat zawk hi Home Quarantine-a awmlai a ni a, Covid-19 chungchanga sorkar thupuangtu Dr Pachuau Lalmalsawma chuan Zonet zawhna chhangin, amah hi Aizawl khawpui veng pakhata Home Quarantine-a awm a nih thu a sawi a, a inkhung hranna hmun hi a him tawk a, fimkhur taka an inenkawl avangin Sorkar buatsaih Quarantine Centre ai mahin a him zawk a ni a ti.
Mizoramin tun dinhmuna Covid 19 kai a neihte hi tunkar chhunga hmuh chhuah vek an ni a. Thawhtanni zan khan Delhi atanga lo haw, Quarantine-a awm lai mi 10 leh Kolkata atanga lo haw mi 2 ten Covid-19 an kai tih hmuh chhuah a ni a, a tuk Thawhlehni zan khan Delhi atanga lo haw hlim bawk mi pakhatin a kai tih hmuh a ni leh a. Nilaini zan zanlai khan Delhi atanga May ni 31-a rel hmanga Mizoram lo thlengte zinga mi, hmeichhe 3 in an kai tih hmuh belh leh a ni a. Ningani zanah mipa 3 leh hmeichhia 2, Delhi leh Gujarat atanga lo hawten an kai tih hmuh chhuah leh a ni a, Nizana hmuh chhuah mi 2 te nen Mizoram chuan Covid-19 kai 23 a nei mek a ni.
