Nizana Aizawl leh Kolasib District Magistrate ten CrPC 144 hmanga mi 5 aia tam punkhawm khapna thupek an chhuah dawnin Sorkar an rawn lo tih Home Minister Pu R Lalzirliana’n a sawi a, hei hi inzah lohna nasa tak a ni a ti.
Assembly Budget Session, zawhna leh chhanna zawhah MNF member, Pu Lalruatkima’n Special Mention hun hmangin Bairabi Zophaia thil thleng a sawi chhuak a, zirlaite leh Mizo Journalist kutthlak an ni leh silai hial hmehpuah a nih a dem thu leh Sorkar chu ram leh hnam humhalh kawnga chak zawka hmala tura a duh thu a sawi a ni. Hemi chungchang a sawifiahnaah Home Minister Pu Lalzirliana chuan he thil thlenga Assam Sorkar chet dan chu an dem hle tih sawiin, Chief Minister remtihna leh Congress Legislature Party-in a lo rel tawh angin, Zophai hmunah hian engtikah emaw chuan Zofate Chawlhbuk chu sak ala nih tur thu a sawi.
Special Mention hmangtu MNF MLA, Pu Lalruatkima chuan, Mizoram chhung Bairabi Zophai hmuna Assam Sorkar chet dan chu a dem thu sawiin, he thil thleng hian Mizo mipuite thinlungah ram leh hnam hmangaihna rilru a chawk tho a ni a ti a, Sorkar chu ram leh hnam humhalh kawngah chak zawka hmala tura a duh thu a sawi.
