Police in an man te hi Lalchhuanmawia kum 23, leh Lalawmpuia kum 21 Ramhlun South mi ve ve, Biakthansanga kum 20 mi, Lunglei Rahsi veng, tuna Ramhlun South a cheng te leh Lalsangliana kum 23 mi Ramhlun Venglai mi te a ni.
Heng mi palite hi police te chuan manin IPC section hrang hrang leh Mizoram Liqour Prohibition Act tlawh chhan in thubuai an siamsak a, na thama mi kutthlak thubuai IPC section 325 hnuaiah hian thiam loh chantir an nih chuan kum 7 thleng lungin tantir leh pawisa chawitira hrem theih an ni.
Police te sawidanin heng mi 4 te hian Chanmari kawnah hian mi pakhat an sawisak rawn a, an thawm hriaa helai bula kal val upa leh midangte pawh kut an thlak a ni. Aizawl SP chuan hetianga kut inthlak leh insawisak rawn ang chi reng reng a thlenin thubuai ziahluh zel an tum thu a sawi a, criminal record neih chu hna dilna ah te, passport dilna leh thil hrang hrangah harsatna tawh theihna a ni tih hriaa fimkhur tuin mipuite a chah a ni.
Chanmari Branch YMA chuan vawiin khan thuchhuah siamin nizan dar 11:30 vel khan police pahnih two wheeler-a chuangte chu heng mi pali, two wheeler thoa chuang te hian Chanmari Presbyterian Kohhran biak in bulah an tibuai a, tlangval pali te hi he kawngah hian lirthei tlan phal loh zawng, wrong side-in an tlan a ni a ti a, buaina \helh tuma kal Pu Lalsawmkima, Chanmari Branch YMA Executive Member leh Chanmari Presyterian Kohhran upa ni bawk chu heng mi pali te hian na taka kut thlakin, a hnar ruh tliak khawpin kut an thlak a ni an ti.
Remna siam tuma kal Chanmari Branch YMA hruaitu leh kohhran rawngbawltu ni bawk leh, dan kengkawhtu police-ten misual kut an tuar hi Chanmari Branch YMA chuan pawi a tiin kutthlaktute an dem takzet tih an sawi.
Vawiina Chandmari Branch YMA emergency meeting chuan an hruaitu leh Kohhran upa meuh kutthlaktute chungah hian danin dik taka a kawng a zawh theihna turin Aizawl police station ah FIR thehlut nise tih relin an thehlut nghal a ni.
