Delhi Police te chuan hmaituam zinga mi \henkhat chu hre tawhin, thubuai an siamsak a, amaherawhchu man an la nei lo a ni. Union Minister, Amit Shah chuan Delhi Police hotute chu bia-in report thehlut vat turin a hriattir a ni. Amit Shah hian Delhi Lieutenant Governor, Anil Baijal pawh university thuneitute nena inbe pawp reng turin a hriattir bawk. Hetihlai hian zirlai leh faculty member te chuan police leh security guard ten anmahni pui tura tha an thawh loh thu an sawi a, misualte awlsam taka an chhuak leh thei pawh chu Police te inthlahdah vangah an puh bawk.
He buaina chhuak hi JNU thuneitute chuan fee tihdanglam vanga thil thleng niin an sawi a. Zirlaite chuan kar kalta khan admission kalphung duh loh lantir nan buaina chawk chhuakin college leh hostel te an suasam niin an sawi bawk.
Union Ministers, S Jaishankar leh Nirmala Sitharaman, JNU alumni ni bawkte chuan tharum thawha buaina chawkchhuaktute chu an dem thu sawiin, Sitharaman chuan sorkarin university zawng zawnga zirlaite himna a ngaipawimawh tih a sawi a, chhuichian vat \ul a tih thu a sawi bawk. Hetihlai hian Union Minister, Prakash Javadekar chuan Congress, Communists, Aam Aadmi Party leh pawl dangten ram chhung hmun hrang hranga university-ah tharum thawhna buaina chawhchhuah chu an tum ber a ni a ti.
Tharum thawhna venghim hna thawk turin Pathianni zanlai khan Delhi Police Hqrs. pawnah mi \hahnem tak an pungkhawm a, zirlaite engemawzat chu buaina a reh huna kir leh tumin university campus an chhuahsan a ni.
Misual rual che lai hmutute sawi danin mi 50 rual vel JNU hung chhungah zan dar 6:30 velah an lut a, tute nge an nih erawh hriat a ni lova, ABVP mi nia rin an ni a, zirlaite hum tumtu professor te pawh kut an thlak a ni. Hetihlai hian JNU SU Vice President, Saket Moon chuan mi tu tih hriat lohten kut an thlak lai hian Police te pawh awm mahse, an thlir liam mai mai niin a sawi. Hemi hnu hian Police te chuan acre 1,000-a zau university campus chu hualin buaina chawhchhuah tum an la awm leh awm loh an dap a ni.
JNU Vice Chancellor M Jagadesh Kumar chuan zirlaite chu an college hung chhungah buaina siam zui lo turin a ngen a, an zirlaiah harsatna an tawh zui lohna turin thuneitu sang zawkin ngaihtuahna an seng mek tih a hrilh a ni. Hetihlai hian JNU Sabarmati hostel complex warden chuan banna a thehlut a, a lehkhaah chuan hostel tana security pek tumna chu tun thlengin a la hlawhtling lo tih a ziak a ni.
Hetihlai hian zirlaite chuan thla kipa an pek \hin hostel fee chu a let thumin a pung tih an sawi a, a hma anga fee kha kalpui leh ni se an duh tih an sawi bawk. JNU thuneitute chuan kum 30 chhung hostel pindan luah man a ngai renga kalpui a ni a, tui, eng leh thildangah kumtin cheng vbc 10 vel an seng ziah tih sawiin, kalphung thlak a hun an tih ve tawh thu an sawi a ni.
