Nizan dar 7:50 vel khan Republic Veng Kawipui bula Pu R. Zothantluanga in Concrete chhawng khat chu a chim a, vanneihthlak takin thi an awm lova, in neitupa Pu R. Zothantluanga leh hnathawka a chhawr mi 7-te chu in chim hian a chim hnan a, Pu R. Zothantluanga hi a ngal rekah in chim hian a chilh chhum a, a ni bakah hian a mi chhawr Kiran Joy chu Aizawl Civil Hospital-ah hruai an ni a, Pu R. Zothangluanga hi emergency-a zai nghal a ni. In chim lai hian Pu R. Zothantluanga nupui leh fate erawh chu hmun dangah an len chhuah avangin an him a ni. In chim tih hriat a nih veleh chhanchhuah hna thawh nghal a ni a, In chimin a chim hnan zingah mi 6 chu awlsam taka lakchhuah an ni a, Pu R. Zothantluanga leh Kiran Joy te chu lakchhuah tlai deuh an ni. An zinga mi 6-te chu First Aid pek an nih hnuah in lamah haw tir leh an ni. In chim hian Pu R. Zothantluanga te KTM Bike leh Aprilia Scooter chu a chimpui bawk a, a chhe lutuk lova, vawiin khan lakchhuah a ni. In chim chhan tak hi chiang taka sawi theih ni lo mahse a In chim ta hi a hlui deuh tawh avang leh a chung lamah In sakna bungrua rit tak dah a nih avang nia thu dawn a ni.
He chhiatna thlenna hmun hi Aizawl District Disaster Management te pawhin rang takin an thleng nghal a, tih theih awm ang ang an buaipui nghal a, mihring tang an la awm em tih an enfiah bakah in chim dinhmun te an enfiah nghal a, ruah a sur bakah a thim avangin Aizawl Bawrhsap, Dr. A. Muthamma, Bialtu MLA Pu R. Vanlalvena leh Republic khawtlang hruaitute thutlukna siam angin a tuka bungraw senghawi turin an \in darh ta a ni.
Republic Veng YMA hruaitute hnen a\anga ZONET thudawn danin Pu R. Zothantluanga hian a kawmtlang lamah in a sa a, hnathawka a chhawr mi 7 te hian zana rora thleng chu an thiar chhunzawm a, hna an thawh lai hian vanduaina hi a thleng ta a ni.
In chimin a chhilh bungraw senghawi hna hi vawiin nileng khan hnatlangin YMA member ten an thawk a, District Disaster Authority-a miten an kaihruaia, bialtu MLA Pu R. Vanlalvena pawhin a hmunah a \hutchilh a, a \ula hman turin pawl leh mimal ten \anpuina engemawzat an pe a ni.
