Khawbunga Zonet corr sawi danin nizan lirnghing sulhnu hi Samthang khua leh ram chhungah a tam ber a, Kawngko lung tla neuh neuh a tam hle. In tihchhiat pawh Samthang khuaah hian a tam ber a ni. Samthang High School thlang kawngpui khi chat avangin in 2 chu dinhmun hlauhawmah a ding a, bungrua an inla chhuak a. Vaphai leh Farkawn inkar kawngah pawh khi chat lai a awm a, khaw chhungah chenna in khi leh bang rem chim leh bal te pawh a awm nual a, khaw kar kawngah pawh leimin leh lung tla hmuh tur a awm nual a ni.
Tuipuiral tlangdung khaw hrang hrangah hian chungkaw tam tak mahni in luma riak ngam lo an awm a, heng mite riahna tur hian khaw hrang hrangin hmun awl remchang lai, hmun him tura ngaihah riahna tur buk an sa a ni.
Champhai bawrhsap Pi Maria C.T Zuali hovin District Disaster Management Team chu tukin khan Champhaiah an thukhawm nghal a, Tuipuiral khaw hrang hrangte hi team hrang hranga insemin an tlawh kual nghal a ni.
Champhai District Disaster Management hi Team pasarih-ah an inthen a, khaw 27 an tlawh kual a. Bawrhsap leh a hote hian Buang, Khuangleng, Leithum leh Dungtlang khuate an tlawh a, team dangin Vanzau, Bungzung, Zawngtetui, Khawbung, Zawlsei, Khuangthing, Samthang, Vaphai, Saikhumphai, Farkawn, E. Chawngtui, Khankawn, Thekpui, Thekte, Sazep, Vangchhia, Lianpui, Sesih, Leisenzo, Hruaikawn, Bulfekzawl, Melbuk leh Zokhawthar khuate a tlawh bawk a. District Disaster Management Team te hian khaw hrang hrangte hi nizung chakna hmanga eng pekna Solar light, hliam enkawlna hmanrua, First Aid Kit, tui thianghlim in tur leh tangkafai tanpuina te an pe a ni.
Mahni chenna in-a riak ngam lo te riahna hmun tur sakna turin Champhai bawrhsap pisa chuan khaw 8 tan mau a phurh khawm sak tawh a, riah buk, Temporary Shelter-ah hian inthiarna leh eirawngbawlna turte ruahman tel a ni a, Electric eng pawh pek luh vek tum a ni.
June 22 atang khan Champhai District Tuipuiral tlangdung hi mihring hriat tham, lirnghing hi vawi 60 chuangin a sawi tawh a, Champhai District bawrhsap kaihhruaina hnuaiah chhiatna liam tham laka mipuite an him theihna turin hmasawnna hnathawh viltu tur District Infrastructure Quality Control Body (DIQCB) din tum a ni tih sorkar thuchhuah-ah tarlan a ni a. Insak, lungrem leh khaw chhunga kawng laih hna thawk turte chuan DIQCB ah hian an hriattir hmasak zel a ngai dawn a, DIQCB ah member ah thiamna bik nei geologist, Engineer leh Architect te an tel dawn a ni.
