Heti hian Mizorama hri kai hmuhchhuah tawh 160 te zingah enkawl dam, damdawi in atanga chhuah tir mi 123 an awm tawh a, enkawl lai 37 an awm mek a ni.
Nimina hri kai hmuh tharte hi Saiha District mi vek, mipa 8 leh hmeichhe 1; kum 18 atanga 28 inkar, Delhi atanga lo haw an ni a. An zinga pakhat chu damlo sa, Isolation Ward-a enkawl lai a ni a, midang pariat chu damlohna nei lo, Quarantine Centre-a awm an ni. An vai hian Siaha-ah enkawl an ni ang.
Mamit-a Covid 19 hri kai enkawl mek 11 zinga hmeichhe pakhat chu a dam tawh avangin vawiin khan Mamit District Covid Care Centre atanga chhuahtir a ni.
Hnahthial District chu hri kai la awm lohna District a ni chhunzawm zel a. Lawngtlai-a hri kai 8, Saitual-a hri kai 3 leh Kolasib District-a hri kai 11 te pawh enkawl dam vek an ni tawh a. Covid 19 hri kai hmuh chhuah tamna ber Lunglei District-a hri kai enkawl 47 zinga 45 an dam tawh a, midang pakhat pawh a sample endik nawnna-ah hri lakah a fihlim thei dawn nia hriat a ni.
Mamit-a hri kai enkawl lai 11 zinga pakhatin vawiin khan damdawi in a chhuah san a, mi 10 enkawl mek niin, midang 4 pawh an fihlim thei dawn nia ngaih a ni a. Aizawl District-a hri kai hmuh tawh 38 zinga 31 an dam tawh a, mi 7 enkawl mek an ni a, Siaha-a hri kai 9 hmuh belh an nih avangin hri kai enkawl mek 10 an awm a, Siaha-ah hian mi 8 an dam tawh ni.
Champhai-a hri kai 9 zinga 5 an dam tawh a, Serchhip-ah hri kai 3 zinga 1 a dam tawh a, enkawl mek mi pahnih pawh hri lakah an fihlim thei dawn nia ngaih a ni. Khawzawl-ah pawh hri kai 2 zinga 1 a dam tawh bawk.
Vawiin khan ZMC Covid-19 laboratory-ah sample 300 chuang endik chhunzawm a ni a, result hi zaninah chhuak tura beisei a ni a. Heng sample endikte hi ZMC, Aizawl, Lunglei, Champhai leh Khawzawl District atanga sample dawn a ni.
Vawiin khan Falkawn damdawi inah Covid 19 vei rinhlelh pakhat admit thar a ni a, a sample lak nghal a ni a, zaninah result hriat beisei a ni.
Tun dinhmunah ZMC-ah Covid 19 damlo mi 7 enkawl mek an ni a, heng mite hi Aizawl District mi vek, Mipa 2 leh Hmeichhia 5, kum 3 atanga kum 57 inkar an ni a, an zingah harsatna hranpa nei an awm lova, Isolation Ward-ah enkawl an ni a, damdawin atanga chuan tir theih thuai beisei an ni.
