Zing dar 9 vela thawk, thlipui na tak hian Vairengte leh a chhehvel, Serlui Assembly Bial huamchhunga khaw hrang hrang 8-a in 147 a ti chhia a, Vairengte ah In-87, Phainuamah 13, Saihapui ‘V’ ah 12, Saiphaiah 10, Saipumah 20, Bilkhawthlir-ah 2, Rengtekawn-ah pakhat leh North Chawnpuiah in-2 a ti chhia a ni. In chhe zinga a tam zawk chu mihring chenna a ni a, Sawrkar Pisa, School leh Kohhran Hall chhia a awm nual bawk.
Vairengteah chuan In chhia zawng zawng 87 zingah in 10 chu luak tlak lohvin a chhe sawp a. UPC NEI:Vairengte Chhimveng Kohhran Hall chu a bang leh a chung thli hian a la a ni.
Vairengtea In chhia te hi nimin leh vawiin khan YMA Branch hrang hrangten an mahni Branch huam chhung theuhah hnatlangin an singsa nghal a, luah tlak lohva in chhia chhungkaw thenkhat te chu an awm lailawkna tur an ruahman sak a ni.
Thli tleh hian Vairengte khaw chhunga electric ban leh hrui a tih chhiat nasat avangin Power Supply a la mumal thei lova, heng Electric ban tlu leh hrui chat sing sa hian Joint YMA Vairengte ruahman angin YMA Branch hrang hranga member ten Power & Electricity deppt a thawktute an hnatlanpui a ni. Thli hi a na hle a, in \henkhat a chung zawng zawng a lak vek te a awm bakah lirthei ke hnih nei chi khawlaia dah te pawh a chhem thlu hial a, heti chung hian vanneihthlak takin mihring thi leh hliam an awm lo a ni.
Serlui bialtu MLA, Pu Lalrinsanga Ralte chuan thlipui tuartu khaw hrang hrang te tlawh kualin chhiatna tuartute dinhmun a enfiah a, khawtlang hruaitute nen chhiat tawkte chhawmdawl dan tur an ruahman bakah sorkar a\anga \anpuina awm thei te a dappui a ni.
