Additional DC Pu Mark Lalthanliana, District Disaster Management Coordinator leh JE te chuan Vaphai leh Farkawn tlangdung an fang a. Champhai SDO Sadar Pu Lalnunfela Chawngthu leh DLAO Pu Benjamin Zalawma Ralte te chuan Khawbung tlangdung lam an fang thung a ni. District lam thuneitute hian mipui thlabar, mahni ina riak ngam lote tana hulhiap zarna tur leh Village Level Disaster Comt te hnenah tangakfai tanpuina leh Silpaulin te an pe a ni.
Nimin tlai dar 5:26pm a magnitude 4.8 a naa lirnghing avangin khaw 25 awmna Khawbung RD Block huam chhunga khaw hrang hrangah lirnghing hnu-hma hmuh tur a awm kal zel a. June ni 22 zing dar 4:10-a na taka lir a nghin hnuah nimin, a ni 14na thleng khan mihring hriat theih chin vawi 50 a nghing nawn tawh a, magnitude 4 aia sang vawi 6 a nghing tawh a ni. Dungtlang-a Pu PB Rosanga te in chunga Khualbuk tur sak thar chu a dinhmun a hlauthawnawm zual avangin vawiin khan thiah a ni a. Chawngtui VC leh YMA te’n Thasiama Seno Neihna tlang lei khi chu a min mai lohna tuin Silpoulin hmangin hnatlangin an khuh a. Samthanga Pu Lawmthangpuia in bang thlang lam chu vuak thiah ngaiin a khi chhia a ni. Khawbung BDO chuan In chhia 70 chuang report a dawng tawh a ni.
