Hri kai hmuh tharte hi Mipa 9 leh Hmeichhia 1 an ni a, Aizawl District mi 5, Siaha mi 3 leh Champhai District mi 2 an ni a, naupang kum 7 mi tih loh chu puitling kum 21 atanga 50 inkar, Bihar, Assam, Delhi, West Bengal, Rajasthan, Uttar Pradesh , Assam leh Maharashtra atanga lo kir an ni.
Hri kai hmuh thar zinga 4 chu hnam dang, NDRF mi leh sa an ni a. Hri kai zinga Champhai District mi 2 chu Aizawla an sample lak a nih hnuah Ningani khan lirthei ruahman bik hmangin Champhai an thleng a, Tourist Lodge-ah khung hran an ni. Hri kai hmuh thar zinga 3 chu natna lanchhuah dan angin an damlo a, midang 7 chuan harsatna hranpa an nei rih lo thung.
Siaha Dedicated Covid Health Centre-a hri kai enkawl lai 6, mipa 1 leh hmeichhia 5 chu an dam tawh avangin vawiin khan damdawi in atanga chhuah tir an ni a. Siaha District-ah hian nimin-a hri kai hmuh thar 3 tih loh a hmaa hri kai hmuh thawh 23 chu enkawl dam vek an ni ta a, hri kai hmuh thar 3, mipa 2 leh hmeichhia 1 enkawl mek an ni. Kolasib District-a hri kai enkawl awmchhun hmeichhia pawh a dam tawh avangin vawiin khan Dedicated Covid Health Centre atanga chhuah tir an ni a, heti hian Kolasib District-a hri kai hmuh tawh 12 chu an dam kim vek tawh a ni.
Nimin-a hri kai 10 hmuh tharte nen Mizorama hri kai hmuh tawh chu 282 an tling ta a, hetihrual hian enkawl dam, damdawi in atanga chhuah tir chu 167 an tling tawh a, hri kai tawh zawng zawng atanga enkawl dam hi zaa 59.21 a ni a, enkawl lai mi 115 an awm a ni.
Mizorama hri kai enkawl lai 115 zinga 87 te chu hnam dang sipai Mizorama awm an ni a, tualchhung mi 28 an awm bawk.
Nimin khan Lunglei Civil Hospital Laboratory-ah sample 43 endik a ni a, heng mite hi hri lakah an fihlim vek a, endik 43 zinga 38 te hi hri kai nena inhnimhnaihna nei an ni.
