Right to Information Act hmanga Zonet zawhna Agriculture Department-in a chhan danin, Fall Armyworm puang hi hmanraw chi hrang rang leh Pesticide hmanga enkawl nghal a ni a, Vaimim hmun engemawzat ei chhe hman mah se, chhiatna nasa lutuk a thlen hmaa ven hman \hahnem tak a awm a, FAW hian Vaimim hmun Hectare 3,409 a zau a khawih a\angin a rah seng tur awm lo khawpa a ei chhiat chu Hectare 37.70 vela zau a ni.
Agriculture Department chhinchhiah danin FAW hian Mizorama District zawng zawng a tuam chhuak vek a, pawi a khawih nasatna ber chu Lunglei District niin, chhungkaw 3,689-te Vaimim hmun a khawih a, Champhaiah chhungkaw 1,440; Serchhip-ah chhungkaw 1,403; Mamit-ah chhungkaw 1,198; Kolasib-ah chhungkaw 873; Lawngtlaiah chhungkaw 604 leh Aizawl District-a chhungkaw 585-te vaimim hmun a khawih sak a, a tuar nep ber Siaha District-ah chuan chhungkaw 388-te Vaimim hmun a khawih sak a. Mizoramah FAW a leng tih hriat a nih ve leh khawl leh rannung thahna hlo hmanga beih let nghal niin, nikum August thla thleng khan FAW beih let nan hian Rs. nuai 51.10 sen a ni a, Vaimim chin hun a inan loh bakah FAW hi ala rem loh avangin sum sen zat hi nikum kumtawp thleng khan danglam thei a nih thu an sawi.
Agriculture Department hotute chuan, Mizorama FAW puang vang hian nikum chhung khan Vaimim thar a tlem phah deuh nia hriat a nih thu leh kum 2018 khan Mizoramah Vaimim Metric Tonne 10,567 thar a nih laiin, nikum khan Vaimim Metric Tonne 8,736 vel thar a ni tih an sawi a. FAW hi a lan tawhna hmunah chuan nasa taka do let pawh ni se, tirem vek tur chuan a lo berah kum 3 vel tal beih a ngai a, hetiang hi ni mah se, Mizorama FAW puang hi do hneh theih beisei a mni a, kum dangah a len nawn tawh loh nan nasa beih zel a nih thu an sawi. Mizoramah FAW a puang tih hriat a nih ve leh a\angin Sorka-in kawng hrang hranga hma a lak nghal thu Agriculture Department hotute chuan sawiin, Agriculture Secretary kaihhruaina hnuaiah State Level Sub-Committee on Incidence of Fall Armyworm leh Agriculture Department (Planning and Monitoring) Jt. Director kaihhruai State Level Rapid Response Team on Fall Armyworm din a ni a. Hemi piah lamah hian Central YMA chu Fall Armyworm puang beilet tura thawhpuiah sawm niin, an kaihhruaina hnuaiah YMA Branch hrang hrang nen Vaimim chinna hmunah FAW pangang thlahtu Phengphehlep suat nan zanah meipui chheh a ni a, hmun hrang hranga loneitute tan Training buatsaih niin, hmanrua leh a thahna hlo a thlawna sem a nih bakah Department mithiamten Faw-in a khawih Vaimim hmunte chu kal chilhin a thah dan an zirtir a, Indian Council of Agriculture Research (ICAR), Indian Institute of Maize Research leh National Bureau of Agricultural Insect Resources nen \ang hovin Aizawlah FAW chungchang zir hona leh inrawn khawmna buatsaih a ni a, TV leh chanchinbu kaltlangin FAW chungchang leh a dolet dan tur puanzar a ni bawk. Heng hmalakna hrang hrang hi a hlawhtling hlea hriat a ni a, FAW-in a khawih Vaimim kung tam tak chu an insiam \ha leh a, rah an chhuah leh thei tih sawiin, Agriculture Department hotute chuan, a tira an hlauhthawn aiin chhiatna a thleng nep ta deuh tih an sawi.
