Mizoram chanchinbumi panga te hi The Aizawl Post News Editor Pu Zohmingmawia, Zonet News Reporter Pu Joseph Lalnuntluanga, AIR News Reporter C.Lalthansangi, Kolasib Duhlai News paper Editor Pu R. Lalnunmawia leh DDK Stringer Pu H.Vanlalnghaka Kolasib te an ni a, kum 2018 March 8 leh 10-a MZP-in Bairabi Zophai hmuna Zofate Chawlhbuk sak an tum chungchang report tura a hmuna kal Assam Police kut tuarte an ni.
Assam Human Rights Commissioner Dr.Anwaruddin Chaudhury hmaah hian a huhoa an inlan hnuah a mal te te-a thu zawhfiah leh vek an ni a. Chanchinbumite hian hetih hunlaia Assam Police ten kut an thlak dan kimchang commissioner hnenah hian an sawi a, an statement-te a lak hnu-ah document an neih angte pawh a rang lama thehlut turin hun a pe a ni.
Commissioner hian heng an statement leh document thehluhte hi Assam sorkarah ziaka thlen a nih tur thu leh a hunlaia Assam Police hotute leh civil administration hotute thu a zawhfiah ve leh tur thu a sawi a, thil awmdan chu National Human Rights Commission hnenah a thlen tur thu te, hrem ngaite zawngchhuaka hma la tura hriattir an nih tur thu te a sawi.
Mizoram atanga journalist kalte hi Guwahati Mizoram House Deputy Resident Commissioner Pu Donny Lalruatsanga’n an kalna tur ngaihtuah sakin a \ul angin a lo buaipui a ni.
