Nikum September thla thlenga Mizoram sorkarin Parliamentary Secretary hna a chelh tir MLA 7 te dan phal loha hlawkna têla puha MLA an nihna atanga ban tura Pu Laltanpuia Pachuau-in Mizoram Larsap, Lt. Gen. Nirbhay Sharma a ngenna lehkha leh hemi chungchanga sorkar lam atanga chhanna an hmuh te chu Election Commission-ah thawn a ni. Hemi chungchanga ZONET thu dawn danin Larsapin Election Commission-a a thawnna chhan hi Election Commission ngaihdan lakna tur a ni a, Election Commission-in thil tih zel dan tur a kawhhmuh angin kal zel a ngai dawn nia thu dawn a ni. Hemi bakah hian Pu Lalrinmawia Ralte, MLA Political Adviser to Chief Minister atana ruat chu dan phal loha hlawkna telna nia sawia Mizoram Larsap hnena Pu Laltanpuia Pachuau-in lehkha a thehluh leh sorkar lam atanga chhanna te pawh Election Commission-ah hian an ngaihdan lak nan thawn a ni bawk a ni. Puan tawh angin Australia khawpui pakhat Sydney-a awm, Pu Laltanpuia Pachuau-in MLA 7 an nihna atanga ban tura a ngente hi nikum September thla thlenga Parliamentary Secretary hna chelhtu, Pu KS Thanga, Lt. Col. ZS Zuala, Pu H. Zothangliana, Pu Joseph Lalhimpuia, Pu TT Zothansanga, Pu K. Lalrinthanga leh Pu Hmingdailova Khiangte te an ni a, he hna an chelh chhung hi kum 2013, December ni 18 atanga nikum, 2017 September ni 1 thleng kha a ni a, heng mite Parliamentary Secretary hna chelh tir an ni hi Constitution Article 191-na bawhchhiatna leh an chanvo tur aia sang dinhmun leh hamthatna a vurna niin Pu Laltanpuia Pachuau chuan a sawi a ni.
