Ni 100 inhlawhna, MGNREGA hnuaia mipui inhlawhna sum chu rural development ministry in vawiin khan mizoram sorkar hnenah a pe chhuak a, kumin January, February leh March thla-a hnathawhna hlawh, la pek lohte chu pek chhuah nghal a ni tih Rural Development Minister Pu Lalruatkima’n a sawi.

Ministry of Rural Development sum pek chhuah cheng vbc 168 nuai 18 sing 7-ah hian thla thum kalta chhunga central sorkar in inhlawhna sum a la pek loh cheng vbc 52 leh nuai 8 a tel nghal a, hnathawh tawhna ba hi Job Card Holder-te account ah vawiin hian lut nghal tur a ngaih a ni tih Pu Lalruatkima hian a sawi a. Kum 2019-2020 chhungin Job Card Holder zawng zawngin RD Block pakhat tih lohah chuan Ni 100 an inhlawh vek ta tih a sawi.

Tunah hian Mizoram pumah Job card nei chhungkaw nuai 2 vel an awm mek a. sorkar kum hluia inhlawh tawhna pek a nih hnuah a la bang cheng vbc 116 nuai 10 sing 7 hmangin mipuite ni 26 vel inhlawhna siamsak theih a ni dawn tih Pu Lalruatkima hian a sawi a, Job Card holder tin te hlawh tur chu cheng 5834 theuh a ni thei dawn a ni a ti.