He thutlukna hi nizana Central YMA pisaa \hutkhawm hmanhmawh an neih hnuah an siam a, All NGO Coordination Committee chuan, Chief Secretary Pu Lalnunmawia Chuaungo hnen a\angin an thil tum \hulh tura ngenna lehkha an dawng tih an sawi a, an lehkha dawn chu thu tlingah an pawm thu an sawi a, Tripura Transit Camp-a Tuikuk awm te Mizorama lo let duh lote ngaihsak zui tawh lo tur leh Mizorama hruai kir hna pawh a tawpna tur atan kumin chhung ngeia zo fel hman tura Mizoram Sorkar leh Home Ministry-in hma lak nghal an tumna chu an ringtawk tih sawiin hemi avang hian Total Bandh huaihawt an tum chu an \ulh ta tih an sawi.
Chief Secretary hnen a\anga All NGO Coordination Committee-in lehkha an hmuhah chuan Election Commission-in Tripura Relief Camp-a awm
mek Bru te vote thlak na tura Mamit District Kanhmuna ruahmanna a siam chu \ha an tih loh thu leh hetihrual hian Tripura camp-a Bru awm te chu an chhenna a\anga um chhuah
anga ngaih an la nih avangin ECI pawhin vote an thlak theihna turin hma a lak a ngaih thu tarlan a ni a, NGO Coordination
Committee-in Mizoram chhung ngeiah Bru ten Vote an thlak tawh tur a ni tih an nawr chu ECI pawhin ngaipawimawh-in nikum Assembly inthlanah Kanhmunah ruahmanna siam a nih thu te, hetilai hian
Inthlan lo awm leh zel turah ECI in Tripura camp a awm Tuikuk te chu an awmna a\anga um chhuah anga ngaia a bik taka ruahmanna a siam sak tawh loh a \ul thu te, hemi atan hian Home Ministry leh Mizoram sorkar te chuan hma lak an tum thu te leh Lok Sabha inthlan zawh May thla tawp lamah Tripura
camp a awm tuikuk te hruaikir hna thawh dan tur sawiho a nih tur thu te tarlan a ni a, Tukuk te Mizorama hruai let hna hi kumin chhung ngeia zawhfel a nih theih nan ruahmanna siam a nih thu Home Ministry hotuten phone hmanga an rawn hriattir thu te tarlan a ni bawk. Hetihrual hian Mizoram Sorkar pawhin Tripura Transit Camp-a Tuikuk awm te laklet hna thawh leh tur chu a tawpna a nih ngei theih nan leh chhuanlam siama Mizorama kir duh lote chu la let tura hmalak nawn a tum tawh dawn loh thu te Chief Secretary chuan a lehkhaah a ziak lang a ni.
Puan tawh angin Central YMA, MUP, MHIP, MZP leh MSU te telna NGO Coordination Committee hian Tripura Transit Camp-a Tuikuk awmte Kanhmuna a bika vote thlak tir tumna chu duh lovin Mizoram pumah Total Bandh huaihawt an tintuah a, an thil tum chungchangah hian nimin khan Chief Secretary Pu Lalnunmawia Chuaungo chuan meeting neihpuiin kaltlangpui lo turin a lo ngen tawh a mahse thutlukna mumal nei thei lova, hemi hnu hian Chief Secretary hian NGO Coordination Committee hi lehkha thawn lehin an lehkha hmuh chu nizan khan ngaihtuahin Total Bandh huaihawt an tum chu an \ulh ta a ni.
