New Zealand ah COVID-19 vanga damlo hnuhnung ber a dam tak avangin, an ram chu coronavirus awm tawh lohna ram ah puan a ni a, coronavirus vanga mipui khuahkhirhna thupek an puante hlih vek a ni.

Prime Minister Jacinda Ardern chuan New Zealand-ah COVID-19 kai an awm tawhlo tih a hriat hian a lawm avangin an in chhungah a lam kual tih a sawi a, ramri chu khauh taka ven zui a la ni zel anga, ramchhunga mipui punkhawm khapna leh social distancing kalpui chu a tul tawh lo tih a sawi.

Mi maktaduai 5 chenna New Zealand ah hian COVID-19 kai mi 1,154 an awm a, mi 22 in an thihpui a, a bak zawng chu enkawl dam vek an ni.