Lt. Col. ZS Zuala, MLA chuan vawiin khan New Serchhipa Fire Station Building thar a hawng. He building hi 13th Finance Commission atanga sum hmuh Rs. 1,79,70,000/- senga sak a ni a, a zau zawng hi 554.76 Sqm a ni. He building-ah hian hnathawktute office, riah luhna tur barrack, duty room leh intihhlimna recreation room a awm a, motor dahna tur garage bakah, lei hnuai lamah tui dahkhawlna tur tuizem lian underground tank a awm bawk a, a sirah Type II Quarters pali a awm bawk a ni. Hawnna thusawiin Lt. Col ZS Zuala chuan Chief Minister, Pu Lal Thanhawla kaihhruaina hnuaiah Home Department-in nasa takin hma a sawn a, tuna Fire Station hawn tak chu kangmei chhuah thulha tangkai taka hman theih tur a ni tih sawiin, kangmei tichhuak lo tura fimkhur chu mitin mawhphurhna niin a sawi a ni. Col. ZS Zuala chuan Home Department hnuaia Chhingchhipa Sainik school din tak chu ram hmasawnna tur lungphum pawimawh tak, officer tam tak leh mithiam chher chhuahna tur niin a sawi a, he Sainik School-ah hian hmeichhe naupang 6 luh theihna turin admission hawn a ni dawn niin a sawi bawk.
Serchhip Fire Station-ah hian tun dinhmunah hian kangthelh motor 2 dah a ni a, Officer 1, Driver 3 leh kangthelh mi, Firemen 6 an awm a ni. Hawnna inkhawm hi Fire & Emergency Services Director, Pu Lalhuliana Fanai’n a kaihruai a ni.
