New Secretariat Complex-a PHE Engineer in Chief Pisa sak tumna mithenkhatin an dodal avanga thudik tawk lo vawrh darh a ni chu tha lo an tih thu Association of Mizoram PHE Officers (AMPO)-in an sawi. Kum 2013 November khan New Secretariat Complex-a ram Plot No. B-17 Square metre 975.16 a zau chu an Department hnuaia Sewerage and Sanitation Pisa sak nan pek a lo ni tawh nia sawiin, hna hi kum 2 chhunga thawh tan tura tih a ni an ti a, helai huam chhungah hian Sorkar Quarters pakhat chhungkaw 6 luah chu thiah tura tih a ni a. Hei hi pawisa awm loh avangin kum 2 chhunga hna tawh tan theih a nih loh bakah chhungkaw 6 luah lai Quarters chu thiah a tul avangin kum 2015, January ni 30-a Site Selection Committee chuan ngaihtuah that leh a tan a dah ta rih niin an sawi. Hemi kum vek June ni 9-a Site Selection Committee thukhawm chuan Plot No. B-17 chhunga PHE Department hnena ram pek tawh chu Sorkar Quarters awmsa thiah ngai lo tura tidanglamin Plot No. B-17 thenkhat leh Plot No. B-19 chu PHE E-in-C Pisa sak nan a pe tha leh niin an sawi a, hnathawh tan a nih dawnah New Secretariat Welfare Committe-in E-in-C Pisa sak tur chu Sorkar Quarters awmsa nen a inhnaih lutuk nia an hriat avangin sa lo tura dilna Sorkar hnenah an thlen a. Hemi chungchang hi nikum July ni 14 khan Chief Secretary Conference Hall-ah ngaihtuah niin, Sorkar Quarters awmsa thiat kher lova a inkar Ft. 10 tal tla tura ruahmanna siam ni se an tih angin, nikum August ni 31-a thukhawm chuan ruahmanna thar chu pawm a. Hemi bawhzui hian nikum vek October ni 20-ah a sakna tur lungphum phum a ni a, a sak phalna pawh AMC-ah dil niin, PHE Building sak a nih dawn avang hian Quarters awm sa thiah tumna engmah a awm lo tih Association of Mizoram PHE Officers chuan an sawi a ni.
Puan tawh angin New Secretariat Complex-a PHE Engineer in Chief pisa sak tur vanga chhungkaw 6 luah lai Quarters thiah a ngai dawna an ngaih avangin MNF thalai chuan tun thla ni 7 khan hnathawktute chu an hna chhunzawm tawh lo turin an ti a ni.
