Nepal Department of Tourism hotupa Dandu Raj Ghimrie chuan kumina Mount Everest lawn zinga thi an tam chhan chu boruak sang kaihhnawih natna te leh hriselna lam thil vang a nih thu a sawi a, tlang lawn tam vang a ni lo a ti.

Puan tawh angin kumin hian Mount Everest lawn chhuah tum mi 11 chu thia puan an ni tawh a, hei hi The Himalayan Times chuan mi an tam lutuk vang leh tlang lawnte himna ngaihthah a nih vang niin a sawi a ni. Ghimrie sawi dan chuan kum 2017 khan tlang lawn phalna mi 366 hnenah pek a nih thu leh 2018-ah mi 346 pek an nih thu te, kuminah chuan mi 381 hnenah phalna pek a nih tawh thu a sawi a ni. Kum 1922 kha Mount Everest lawn tum zinga thi an awm hmasak ber a ni a, khami hnu khan tun thlengin thi zat hi mi 200 chuang a ni tawh a, ruang tam zawk chu vurin a chhilh avangin hlawm theih a ni lo a ni.