India leh Israel thawh dunna, Mission for Integrated Development of Horticulture hnuaia Haulawng leh Mualthuam North inkar rama din, Indo-Israel Centre of Excellence For Fruits chu nimin khan Chief Minister, Pu Lal Thanhawla leh Israel Ambassador, Pu Daniel Carmon ten an hawng. He Project hi Rs.9,00,00,000/- senna tur a ni. Hawnna inkhawma thu sawiin Chief Minister chuan Mizoten an ngaihsan em em Israel nena kuthnathawktute hmasawnna tura thawhhona siam chu Mizoram pumin an chhawr tangkai theih a beisei thu a sawi a, he Project dintu mithiamte chuan a hlawhtlinna turin phur takin hna an thawk niin a sawi a, Mizorama mi rethei, eizawnna ngelnghet an neih theihna turin NLUP hmangin chhungkaw sing tam tak tanpui an nih thu te, an hlawhtlinna entirna turin NLUP Kutpui neih mek a nih thu te, lehkhathiam hna nei lote mahni kea an din ve theihna tura kaihhruaina pe turin Indian Institute of Management Kolkata nen Entrepreneurship Development Scheme hlawhtling takin kalpui mek niin a sawi bawk. India rama Israel Ambassador, Pu Daniel Carmon pawhin thu sawiin Indo-Israel Centre of Excellence For Fruits chu hlawhtling taka kalpui tum a nih thu te, lo neih lamah leh tui tangkai taka hman kawngah India leh Israel te chuan thawhho zel an tum niin a sawi a ni. Hawnna inkhawm hi Horticulture Minister, Pu PC Lalthanliana’n a kaihruai a ni. Haulawng leh Mualthuam inkara Indo-Israel Centre of Excellence For Fruits dinna hmun hi Haulawng leh Mualthuam VC te pek a ni a, hetah hian Israel thiamna hmangin kum 2015 atang khan hnathawh tan a ni a, ram hectare 10.20-ah hian Dragon fruit leh serthlum chi hnih, Mandarin Orange an tih ang chite an ching a, hengte bakah hian Mizote thei chin chi hrang hrang lakhawma chin ve tum a ni bawk. He thei huan hi Haulawng leh Mualthuam inkar kawngpui atang hnai te-ah siam a ni.
