Nawrh ti tawp turin Union Minister-in Gorkha Janmukti Morcha ngen

Gorkhaland state thar siam ngiat avanga Darjeeling-a tiam chin awm lova bandh huaihawt a nih atanga thla hnih a liam hnuah, Union Home Minister, Rajnath Singh-a chuan Gorkha Janmukti Morcha hruaitute chu an nawrh titawp turin a ngen. Pu Rajnath Singh-a hian West Bengal CM, Mamata Banerjee-i chu Darjeeling-a thil thleng chungchangah hian tan la tura chahin, GJM hruaitute be tur leh, he buaina avanga internet, TV leh civil mite mamawh thil hrang hrang tihtawp mek chu hlip turin a ngen a ni. Puan tawh angin, June ni 8 khan Pi Banerjee-i’n cabinet thutkhawm a kohna hmun, Raj Bhavan bulah Gorkhaland ngiattute leh police inkarah buaina a chhuah avangin nawrh huaihawt tan a ni a, Gorkhaland ngiattute hi CM-in state chhunga zirna in zawng zawngah Bengali tawng zirtir vek a tum avanga lungawi lo an ni a, hei vang hian CM hnen atang hian Darjeeling-a zirna inah Bengali zirtir a nih loh tur thu tiamna lehkha an phut a, Darjeeling-ah hian Hindi leh Nepali tawng hmang an tam ber a ni. Home Minister nena an inbiak hnuah, GJM hotu pakhat, Swaraj Thapa-a chuan thuthar lakhawmtute hnenah bandh tihtawp chungchanga thutlukna chu ni eng emaw zah hnuah siam a ni dawn tih a sawi a, Gorkhaland chungchangah erawh chuan an thil tum a hlawhtlin hma chu inremna a awm thei dawn lo nia sawiin, Pu Rajnath Singh-a hi state thar din tura lo inpuahchah tan turin an ngen niin a sawi bawk a ni.