Naupang kum 12 chin hnuailam pawngsualtute thi tura hrem theihna tur dan, ordinance-a hman mek chu dan puitling ni turin parliament in a pass fel ta.

Criminal Law Amendment Bill hi Lok sabpha chuan thla hlui khan a lo pass tawh a, vawiin khan Rajya Sabha a paltlang ve leh ta a ni. He bill hian Criminal Law (Amendment) Ordinance April ni 21-a lo puan tawh chu dan puitlingah a hlangkai ta a, he dan thar hnuaiah hian pawngsualtute hremna na zawk pek theih an ni tawh dawn a, a bikin naupang kum 12 chin hnuailam pawngsualtute chu thi tura an chungthu rel theih a ni tawh ang. Zawhna chhangin Minister of State for Home Kiren Rijiju chuan naupang kum 12 chin hnuailam pawngsual rawntute chu dam chhung lung in tan tir emaw thi tur emawa an chungthu rel theih a ni tawh dawn tih a sawi a, dam chhung tih hi an thih ni thleng tihna a ni dawn tih a sawi a, kum 12 leh 16 inkar pawngsualtute hremna nep thei ber kum 10 chhung lungin tan tih pawh kum 20 ah tihpun a nih thu a sawi a, kum 16 chin hnuailam pawngsualtute chu a nawlpuiin dam chhung lung tantira hrem an ni ang.