Sorkar laipuia Health and Family Welfare Ministry leh Registration of Births and Deaths te duh dan angin ram puma nau piang leh mitthi, hmaih nei lova dik taka chhinchhiah an theih nan vawiin khan Aizawl Civil Hospital Conference Hall-ah hnathawktute training pek an ni a, Aizawl West District Chief Medical Officer, Dr. Lalthanga’n a kaihruai a, Economics & Statistics Deptt.-a Deputy Director, Pi Biakchungnungi’n he hna thawh dan tur a sawifiah a, Mizorama nau piang reng reng, thi saa piang pawh chhinchhiah vek tur a nih thu leh, mitthi zawng zawng pawh chhinchhiaha certificate pek chhuah tur a nih thu a sawi. He training-ah hian Dr. Lalthanga chuan sorkar damdawi in 88-ah leh private damdawi in 15-ah Registration of Births and Deaths Unit hawn a nih thu te, an sum mamawh chu National Health Mission a\anga pek a nih thute a sawi a. National Health Mission hnuaia Health Management Information System Consultant, Pu C. Vanlalsiamthara pawhin inah emaw, Health Sub Centre-a piang emaw, thi saa piang pawh mitthi dangte nen kim taka chhinchhiah a, a report-na form thar siama ziah vek tur a nih thu a sawi a ni. He Training-ah hian Aizawla Private damdawi in hrang hrang leh District hrang hranga Medical Officer-te an tel a ni.
