Larsap chuan khua leh tui, vote nei tawh zinga kum naupang zawk ten phur taka vote an thlak theihna turin National Voters’ Day chu rampumah hman a ni, a ti a. No voter is to be left behind tih thupuia hmangin vote nei zawng zawngin vote an thlak vek theihna tura inzirtirna neih a ni a ti. Election Commission of India in Systemic Voters’ Education and Electoral Participation a kalpui avangin nasa takin Voter ten an chanvo bakah Election kaihhnawiha an mawhphurhna leh an tihtur te an hriatchian phah tih Larsap chuan a sawi a, India ram inthlan dan chu ramdangte ngaihsan leh entawn inthlan dan thianghlim leh langtlang a ni a ti a, Mizoramah hlawhtling taka inthlanna felfai leh thianghlim kalpui a nih theihna tura theihtawp chhuahtu sorkar hnathawkte, Mizoram People’s Forum, YMA leh Kohhrante chungah Larsap chuan lawmthu a sawi bawk.
Chief Electoral Officer Pu Ashish Kundra pawhin thu sawiin hlawhtling taka Mizoramah inthlanna buatsaih thei tura tha thawhtu zawng zawngte chungah lawmthu a sawi.
Larsap hian Voters’ Helpline Phone No 1950 leh Pianphunga Rualbanlote hman tangkai tur Mobile apps te a tlangzarh a, Voters’ Day puala Chief Election Commissioner Sunil Arora thuchah ngaihthlak a nih bakah National Voters Day Award 2019 semchhuah a ni bawk.
