An member pungkhawm te hmaah thusawiin, NTUM President, Pu C. Remtluanga chuan, MR hnathawk pungkhawmte chu an nuar lo tih sawiin, nawrh chu hun lo kal tur a nih avangin a hun tur a sawi lawk theih lova, hetihrual hian NTUM member pungkhawmte hmel a\ang hian enge an tih ngam ang tih chu a lang thei a ni, a ti. Pu C. Remtluanga chuan, kum tam tak MR a thawkte dinhmun chhe tak, enkawlna dan engmah siamsak loh, hnathawk tur lak belh zel ni bawk si leh an thawh hlawh bak ham\hatna dang hmu lote dinhmun \ha zawka dah tura an dilna sorkar-in ngai pawimawh a, tuna an dinhmun aia \ha hret Privisionel Employee tia sorkar-in chawi kan a tum chu an lawm hle tih a sawi a, MR te dah nghehna tura an Quota zaa 25 ni \hin zaa 30-a tihpun a ni te, kum 7 hnua ngheh theih tih te, TA leh DA group hniam ber anga Bill theih tih leh hnathawktu kum 60 an tlin hnuah ban tur tih a ni te chu an lawm hle a, hei hian dinhmun \ha zawk an pan a, sorkar-in sorkar hnathawk pangngai anga a en chho hret hret tih a lantir vang a ni tih sawiin, heng an dinhmun hi MR te dinhmun zirchiang tura sorkar-in a ruatte duan chhuah a ni a. Hetihrual hian MR hnathawkte chu an thi ve thei a, damlo na tak takte pawh an awm ve a, chung mite chu an \hat lai hun zawng zawnga sorkar tan an theihna lo seng tawhtute an nih ve bawk avangin heng mite tana ngaihtuahna \ha zawk seng leh turin sorkar chu an duh tih a sawi.
NTUM member kalkhawmte hian resolution siamin, MR te chu Privisionel Employee dinhmun pek an nih chuan Labour Law hman theih loh tur tih a nih bawk si avangin sorkar phal loh thil ti an awm thulh a, dan hmanga chung mite hremna tur Conduct Rules siam sak tur te, Earned leave pek phal an nih loh pawhin, Casual leave bakah kum khatah ni 15 a\anga ni 20 thleng chawlh theihna ruahman sak tur te, damloh nikhuaa an phurrit chawkna tur Medical Benefit siam sak ve tur te, MR te chu kum 60 an tlin hnuah ban tur tih a nih avangin maipar thlawna an thlawn tawp loh nan Pension benefits siam sak ve tur te, MR te chu sorkar hnathawk nghet aia hah an nih rualin dinhmun chhe zawk an nih an nih avangin Overtime Allowance ruahman sak tur te, an hlawh chu kum 5 dana en nawn sak \hin tur leh, Group C leh D hnathawkte chu thla khata Rs. 25,000 leh Rs. 15,000 inkar tal an hlawh theih nan an hlawh en nawn sak tur leh an hnathawh laia boralte zangnadawmna siam sak tura an duh thu an sawi a ni.
NTUM thil phut chungchang hi vawiin khan Chief Minister, Pu Zoramthanga’n an pawl hruaitute a sawipui nghal a. MR hnathawkte chu an dinhmun a chhia tih sorkar-in a hriat thu lo hrilhin, an mahni chawi kan chu sorkar pawhin a duh a, an thil phut hrang hrang leh an dinhmun chu ennawn sak an nih tur thu a lo hrilh a. Chief Minister-in an thil phut ngaihtuah a nih tur thu a lo hrilh chu an lawm hle tih sawiin, NTUM hruaitute chuan, sorkar nawr nana nawrh huaihawt ngawt chu an tum ber a nih loh thu leh hetihrual hian a \ul a nih chuan nawrh huaihawt chu an ngam a ni tih vawiina an pungkhawm hian a lantir nia an ngaih thu an sawi.
NTUM hotute sawi danin, MR hnathawk hi Department 55-ah mi 10,000 vel an awm mek a ni.
