National Nutrition Week chu Mizoramah pawh hman \an a ni a, Hnahthialah chuan he hapta hi nimin khan Hnahthial leh Thiltlanga Anganwadi Worker leh Helper-ten ICDS Conference Hall-ah an hmang a. National Nutrition Week hawngtu, CDPO, Pu VL Hmuaka chuan an thil tum ber chu naupang kum 6 chin hnuai lam chaw tha pek leh enkawl that niin a sawi a, naupangte chu chaw tha pek an nih phawt chuan an than chhohnaah rilru leh taksa hrisel an nei dawn niin a sawi. CDPO chuan an hnathawh chuan nu nau pai, nau pawm leh tleirawlte thlengin a huam niin a sawi bawk. KVK Hnahthiala Scientist, Pi Zonunkimi Ralte chuan man tlawm zawka chaw tha siam dan leh naupangte chaw tha pek dan a sawifiah a, he inkhawm hi Circle Officer, Pu V. Lalhmingliana’n a kaihruai a ni.
