National Health Mission Director, Dr Lalrozama’n National Health Mission hnuaia TB veite enkawl dan thar, Universal Drug Sensitivity Testing chu Mizoramah hman thuai tur a ni tih nimina a Office-a State TB Officer, leh TB Programme Officer te thut khawmnaah a sawi a, Universal Drug Sentivity Testing hi hman a nih chuan TB vei hmuh chhuah zawng zawngte chu TB damdawi pangngai ngeih lo, anmahni enkawlna tur damdawi zawn chhuah ngai, Multi Drug Resistant TB an ni nge ni lo tih enfiah vek a ni ang a, Multi Drug Resistant TB an nih chuan hun hloh lovin a enkawl dan tur dik takin rang zawkin damlote chu enkawl theih an ni dawn niin a sawi. Khawvel ram dang dinhmun leh India ram dinhmun khaikhinin National Health Mission Director chuan India ram hi TB leh Multi Drug Resistant TB vei tamna niin a sawi a, Mizoramah pawh Multi Drug Resistant TB vei an tam tawh tih sawiin, nikum chhung khan MDR TB vei mi 47 hmuh chhuah an ni a, an zinga za zela 66 chu enkawl dam niin a sawi. He thutkhawmna-ah hian State TB Officer, Dr. Vanlalfela pawhin Mizorama TB Programme hman dan leh hlawhtlin dan a sawi a ni.
