Kumina ‘National Bravery Award 2017’ dawng tur mi 16 zingah Mizo naupang pahnih an tel a, January 26 India Republic Day-ah Prime Minister-in a hlan ang. Mizoram atanga award dawng tur te hi kum 18 mi nia boral, F Lalchhandama Tuikual South-a pu F Lalmalsawma fapa leh kum 16 mi Zonuntluanga Sialhau khua-a Pu K Lalthanpuia fapa te an ni. F Lalchhandama hian kum 2017 May 7 tlai khan a thiante nen Reiek kai Tlawng luia an kalnaah a thianpa tuia chesual chhan a tumna lamah a nunna a chan a, an pahnih hian tuiah hian an tlahlum ve ve a, chawimawina hi a nu leh pa ten a aiawhin an dawng ang.
Zonuntluanga hi kum 2016 August 12 khan a pa K Lalthanpuia nen an khaw ramah chawhmeh zawngin an chhuak a, an haw lam chu savawmin a pa hi beiin an insual thawmah Zonuntluanga hian a pa chhan tumin savawm hi a hriam ken ang ang nen a bei ve a, hetianga an beihlet tak avang leh an authawm avang hian savawm hi a insaseng a, a pa hliam tuar hi an khua thlengin a chhawm haw a ni.
National Bravery Award hi naupang, kum 6 – 18 inkar hnenah a hrang ve vea pek thin a ni a. Kum tin India Republic Day ah leh Independence Day ah te chawimawina hi hlan thin a ni. Mizoram State Council for Child Welfare-in Indian Council for Child Welfare hnenah a dilsak a, ICCW hian a dawng awm hi an lo thlang chhuak thin a ni.
