National Accountability Bureau-in Nawaz Sharif leh a fapa ko

Pakistan-a hlemhletna chhuitu pawl, National Accountability Bureau-in PM bang ta, Nawaz Sharif leh a fapa pahnih chu Zirtawpni-a inlan turin a kova, Al-Azizia Steel Mills thubuaiah Pu Sharif-a leh a fate – Hussain leh Hassan Nawaz-a hi Lahore-ah thu zawh fiah an ni ang a, Panama Papers-a an hming a lan ve chungchangah pawh chhui an ni ang. Thla hlui ni 28-ah khan judge 5 awmna, Supreme Court chuan Pu Sharif-a hi Joint Investigation Team thil chhuinaah thiam loh a chantir a, hei vang hian PM a nihna atangin a bang nghal a, court sang ber chuan National Accountability Bureau hi Pu Sharif-a leh a fanu, Maryam Nawaz leh a pasal, Muhammad Safdar leh Pu Sharif-a fapa pahnih leh Finance Minister hlui, Ishaq Dar-a pawh thla leh ni 8 hmaa thubuai siamsak turin a hrilh a, hengte hi London-a in an neih chungchang leh ram danga company 16 vel an neih chungchang chhuina tur a ni. Thawhlehni khan Pu Sharif-a hian Supreme Court-ah lehkha thehlutin, PM a nihna atanga ban a nih chungchang chu ngaihtuah nawn leh turin a ngen a, Panama Papers chungchangah pawh ngenna a thehluh avangin thutawp siam rih lo turin court sang ber chu a ngen a, ram danpui Article 188-naa tarlan angin, a chungchang hi ngun taka ngaihtuah hmasak a nih loh chuan bantir theih a ni lo niin a sawi.