MNF President, Pu Zoramthanga’n nakkuma Assembly inthlan lo awm turah an party chu a mal din dawn tih vawiina Mizo Hnam Run inkhawmah a sawi nawn a, mi thenkhatin BJP nena thawk ho tur anga an sawi chu thu dik lo nia sawiin, kum 30 vel kal ta chhunga party dang nena an thawhho thinah pawh an tifuh tak tak lo niin a sawi. Pu Zoramthanga chuan, National Democratic Alliance-a an tel ve chungchanga mi thenkhatin BJP thuhnuaia awm anga an party an sawi pawh thu dik lo niin a sawi a, NDA chu ram puma Congress duh lo party hrang hrang inzawmkhawm a nih thu sawiin, MNF pawh Congress nena insu ber a nih avangin a tel ve a, BJP-a inchhun luhna leh a thuhnuaia awm nihna a ni lo tih sawiin, North East Democratic Alliance (NEDA) chu NDA peng pakhat ve mai niin a sawi. Pu Zoramthanga chuan, MNF-in thuneihna a chan chuan, sorkar pisa leh zirna in hrang hrangah tihluihnaa Yoga zirtir chu an remti dawn lo tih a sawi a, Bawng talh khap te, tihluihnaa sakhaw danga inleh tir te, Mizorama tihluihnaa Hindutva lak luh te leh Mizo-te sakhaw ni pawimawh bik, Pathianni leh ni pawimawh dangte tibuai zawnga thil tih, phai lam atanga rawn ruat thinte leh VIP lokal turte pawh an dodal zel dawn niin a sawi. An pawl inkhawm hi an pawl PAC member. Pu Lalchamliana’n a kaihruai a ni.
