N.Korea-in a missile kahchhuah hlawhtlinna lawm

North Korea-in a missile kah chhuah hnuhnung ber hlawhtlinna chu ropui takin a lawm niin sorkar media-in vawiin khan a sawi a, halpuah leh halmawite halin, North Korea khawpui, Pyongyang khawpui laili-ah mi sang tam tak an pung khawm a, an hlawhtlinna chuan khawvel hmaah North Korea ram chakna leh thiltihtheihna a pho lang tih inziahna puanzar chu an keng lang bawk a ni. Puan tawh angin, Nilaini khan North Korea chuan khawmualpui dang kap phak, intercontinental ballistic missile thar, Hwasong-15 chu hlawhtling takin a kap chhuak a, mi thiamte chuan he missile hian a hmaa missile kah chhuah tawhte chu a khum hneh hle niin an sawi a, North Korea hruaitu lu, Kim Jong Un chuan an ram chu nuclear ralthuam neitu ram dik tak tia koh theih a ni tawh niin a sawi a ni. Pyongyang-a he hlawhtlinna lawmnaah hian Kim chu inlan lo mah se, sorkar mi pawimawhte leh sipai hotute chu an tel kim deuh vek a, ram rorel khawl, Central Committee Vice Chairman, Pak Kwang-Ho chuan mipuite hnenah an ram hmasawnna chu tuman an dal thei lo niin a sawi. South Korea leh US thlawhna sipaite chuan kar lehah indo nun chan zir ho leh dawn a, hei hian Korea ram chhehvel boruak a tihsosan zual rin a ni.