MZP huaihawtin vawiin khan Tuikual South-a an pawl Pisa Conference Hall-ah Mizoram leh Assam ramri chungchang sawi ho a ni. A sawi hawngtu MZP President, L. Ramdinliana Renthlei chuan, thalai leh ram veitu inti thenkhat zingah Mizoram chin nia lang neih let duh tawh lo zawng leh luah seng lo tur anga ngaihdan nei an awm chu tha lo a tih thu sawiin, khawilai hmun pawh Mizoram a nih chuan a enkawl dan tur leh a tihzui dan tur chu a ram neitute rel tur a ni tih hria se a duh thu a sawi. L. Ramdinliana Renthlei chuan, Mizoram ramri dik tak humhalh kawngah thangtharte leh Zoram mipuite kaiharha thudik hriattir turin MZP chuan hma a la zel dawn tih a sawi a, hemi atana hmalakna hmasa atan tun thla ni 27 atang hian Bairabi-a Chief Minister hlui Pu Ch. Chhunga leilet-a a nupui Pi Lalrothangi ram pekah Zofate Chawlhbuk an sa tan dawn tih a sawi. Sawihona MZP Vice President, B. Vanlaltana kaihhruaiah hian Political Party leh pawl hrang hrang aiawhte an tel a. Joint Action Committee On Inner Line Reserve Forest Demand Mizoram Chairman, Pu F. Ngurbiakvela’n “Mizoram Inner Line Forest Reserve” tih paper a buatsaih an zirho a, Mizoram ramri humhalh tura hmalak dan tur hrang hrang an sawi ho nghal a. Inner Line Forest Reserve Mel 509 biala zau Assam Sorkar-in a enkawl mek chu Mizoram Sorkar enkawl tura laklet a nih theih nan leh pi leh pute atanga Mizoten an rochun Mizoram chu humhim tura hmalak ni se, hemi atan hian pawl leh Political Party-te tanrual tlat ni se tiin resolution an pass a ni.
