MZP Executive Committee vawiina an pawl Pisa-a \hukhawm chuan Bairabi Zophai hmuna Mizoram sorkar leh Assam sorkar hmalakna chu April ni 15 thleng ngaichan ni se a ti. Nimina Union Home Secretary kaihhruainaa Mizoram leh Assam Chief Secretary inbiakna Mizoram tana \ha lo tur zawnga ngaih theih tura thutlukna siam a ni chu pawi a tih thu sawiin, kha inbiakna kha inbiakna awmze nei lova an ngai thu sawiin, Zophai hmunah hian Status Quo puan a nih dawn chuan Assam Sorkar-in Mizoram chhunga School, Police Out post, refugee camp, Biak In a sakte leh kut alo thlak tawh zawng zawng chu kumin April ni 15 hma ngeia \hiah an phut thu leh hun tiam chhunga Assam sorkar-in a \hiat lo a nih chuan Zofate chawlhbuk sa turin MZP chuan hma a lak nghal tur thu te, nimina inbiakna khan Zophai hming thlaka ‘Kartuchal’ hming lo lang ta mai chu MZP chuan hriatthiam harsa a tih thu leh a duh loh thu sawiin, Zophai chu hnam dang hming a put an phal ngai loh tur thute an sawi a. Engtikah emaw Zophai hmunah hian Zofate chawlhbuk sak a nih ngei theih nan leh Assam sorkar-in Mizo zirlai pawisawi lote leh Media te kut a thlak duh loh entirnan leh Mizoram ramri chungchangah MZP chuan a dinna tihchian nan naktuk chawhnu dar 1 hian Aizawl Vanapa Hall tualah Sit-in demonstration a nei dawn a, hetah hian mipui a tam thei ang ber \awiawm turin an ngen nghal a ni. MZP chuan, Assembly Budget Session neih mekah hian Inner Line Reserve, mel 509 a zau chu Mizoram chhung ngei a nih thu leh lak let a nih theih nana hmala turin Resolution pass a ngen a, tun dinhmuna Mizoram a din mek laiin Bangladesh a\anga dan lova India-a lo lut, Mizorama chambangte chu an ramah haw turin MZP chuan a hriattir a, an haw lo a nih chuan an chungah engpawh lo thleng se MZP chuan mawh a phur dawn lo tih an sawi a ni. Vawiina MZP \hukhawm hi an President, L. Ramdinliana Renthlei-in a kaihruai a ni.
Nimin tlaia Mizoram leh Assam Chief Secretary te Union Home Secretary kaihhruaina hnuaia New Delhi-a an inbiaknaah Bairabi Zophai hmuna state pahnih ram inchuh lai chu Survey of India mithiamte nen State pahnih aiawhten a hmunah enfiah se an ti. Press Information Bureau thuchhuah tarlan danin Union Home Secretary Rajiv Gauba kaihhruai meeting-ah hian Ministry of Home Affairs Joint Secretary North East changtu leh, Mizoram leh Assam Principal Secretary te telna Team chuan Zophai hmun hi hapta khat ral hmain tlawh se tih lungrual takin an pawm a, he team hi Survey of India mithiam ten an puibawm ang. He Team hian an thil hmuhchhuah chu Union Home Secretary hnenah thehlutin, hei hi State pahnih Chief Secretary te nena meeting neih leh hunah sawiho leh a ni ang. Hemi hnuah hi chuan Union Home Minister in Assam leh Mizoram Chief Minister te Meeting a neihpui tawh ang. Meeting-ah hian Assam Chief Secretary T.Y Das leh Mizoram Chief Secretary Arvind Ray te hian Bairabi bula chawlhbuk sak chungchanga an state sorkar te dinhmun ve ve an sawifiah a, State sorkar pahnihte hian muanna vawnghim-a inngeih tawn taka harsatna chinfel an tum tlat tih an sawi nawn ve ve a ni. Helai hmun hi a awm dan pangngaia awm tir nise tih an rel a, a bul vela mipui punkhawm khap a ni ang a, Assam leh Mizoram Sorkar te chuan an mahni lam ve ve ah boruak muanawm vawnghim turin a tul apiangah hma an la bawk ang.
