Myanmar sipai leh hel pawl, Arakan Army te inbeihna avanga ramri hnaiha rahpuah bomb sut hna thawh mekah 35 sut fel a ni tawh. Lawngtlai District Myanmar ramri velah nikum kum tawp lam khan Myanmar sipai leh Arakan Army te hi an inkap thin a, hemi kaihhnawiha rahpuah bomb phum ruk tam tak awm nia hriatte chu thenfai zui zel a ni. ZONET zawhna chhangin Lawngtlai SP, Pu Lalsanglura chuan Assam Rifles mi bomb phumruk dap chhuah thiam ho leh Mizoram Police tangrualte chuan tun hnai thleng khan rahpuah bomb phum ruk 35 hmu chhuakin an sut fel tawh a, rahpuah bomb dang phum ruk engemawzat la awm nia rin a nih avangin bomb zawn chhuah thiam te chuan bomb zawn hna an la thawk zui zel a ni. Puan tawh angin ramria rahpuah bomb phum ruk avang leh Myanmar Sipai leh hel pawl inkahna thleng avang hian ramria awm, Mizoram mi engemawzatin vanduaina an lo tawk tawh a, chungte chu nikum November ni 25-a silaimu tawng palha hliam na tak tuar, Tuichawngtlang khaw mi, Robichondro te, Sabualtlang khaw mi, Monodo, December ni 12-a Myanmar Sipaiten Hel emaw tia na taka an kah hliam te, Burdukbanga khaw mi, Jitua Tongchongya, kumin January ni 15-a rahpuah bomb rah puah vanga a ke veilam bung te, Kawnkhaw nu, fa 4 nei, Pi Khusoma, January ni 18-a rahpuah bomb rah vanga thi ta te an ni. Hetiang vanduaina thleng thin vang hian District thuneitute chuan bomb sut thiam ten bomb phum ruk an sut zawh hma chuan ramri hrula kal tawh lo turin khaw hrang hrang mipuite an ngen a ni. Hetihlai hian Myanmar Sipai leh Arakan Hel pawlte inkara inkahna thleng thin vanga raltlan, Lawngtlai District-a Zochachhuah leh Hmawngbuchhuaha dahkhawm te chu thawn kir an la ni lova, Police te sawi danin vawiin thlenga raltlan la awm te hi 1,050 vel an la tling a ni.
