Myanmar sipaite leh Arakan Army inbeihna avanga raltlan, Lawngtlai District-a Laitlanga dahte chu an awmna a ralmuan loh avangin nimin khan Dumzautlang leh Hmawngbuchhuahah sawn an ni. Lawngtlai District SP, Pu Lalsanglura hnen a\anga ZONET thu dawn danin nimin khan Laitlang khaw bul ramri hrulah Myanmar sipaite leh Arakan Army tia hriat hel pawlte hi nasa takin an inkap a, Laitlanga in \henkhat pawh an silai mu leng hian a kah fuh avangin helai hmuna raltlante dah chu a him tawk lova ngaih a ni a, Laitlanga raltlan, mi 291 vel chu Hmawngbuchhuah leh Dumzautlangah te sawn an ni. Hetianga ramri hrula Myanmar sipaite leh hel pawlte an inkah reng lai, nimin khan Mizoram Police leh Assam Rifles \angrualin Laitlang bul ramriah wireless set 1 an man a, hei hi Myanmar sipai lam ta nge hel ho ta tih pawh a la hriat theih loh a ni. Myanmar mi raltlan, Zochachhuah, Hmawngbuchhuah leh Dumzautlanga dahte hi Police te chhinchhiah dan chuan 1,615 an la ni a, amaherawhchu, inkahna a reh a, boruak ralmuang deuha an hriat veleh ramri kana an khaw lama an let leh thuai \hin avangin raltlan awm zat hi a danglam fo niin Police chuan an sawi. Food, Civil Supplies & Consumer Affairs Deptt. a\anga thu dawn danin heng mite ei tur hi Home Secretary leh Food, Civil Supplies & Consumer Affairs Secretary ruahman angin pek zui zel a ni a, an ruahman dan chuan Food, Civil Supplies & Consumer Affairs Deptt. hian Home Deptt. chu buhfai quintal khat Rs.2,750/- zelin a pe ang a, hetiang hian DCSO-in ral tlante awmna hnai ber kudamah an mamawh buhfai a dah \hin ang a, kudam a\anga ral tlante awmna thlenga buhfai phurh man pawh Home Deptt.-in a tum dawn a ni.
