Myanmar sipaite leh hel pawl, Arakan Army tia hriat-te an inkah \hin avanga Myanmar mi, himna zawnga Mizorama lo lut, ramri dep khaw hrang hrang 4-a awmte chu Central YLA hruaituten mutbu leh silhfen an pe. An khawsakna atana thil pawimawhte hi Central YLA President, Pu J. Sangthangpuia kaihhruai, Central YLA hruaituten kar kal ta Zirtawpni khan an awmna hmun hrang hrang tlawhin an sem a, chung khuate chu Zochachhuah, Hmawngbuchhuah, Dumzautlang leh Laitlang te a ni a, heng khaw 4-te hian Central YLA chuan Relief Committee a din a, heng Committee-te hi Central YLA chuan Rs.1,000/- \heuh a pe bawk a ni. Zirtawpni kal ta khan heng khaw hrang hranga Myanmar mi raltlan awm zat chu Zochachhuah-ah 309, Hmawngbuchhuah-ah 507, Laitlang-ah 291, Dumzautlang-ah 287 an ni a, an vaiin mi 1,394 an ni. Lawngtlaia kan Corr. sawi danin ramri lehlama inkahna avanga nunphung a ralmuan loh veleh ramri hrula chengte hi Mizoram lamah an lo tlan \hin a, boruak a ralmuan leh deuh veleh an khaw lamah an haw leh \hin avangin raltlan zat hi a danglam deuh reng a ni. Raltlan zinga tam zawk chu khaw chhunga awm lovin khaw daiah an inkulh a, ni tin, an ei tur buhfai khaw chhungah an khawn \hin a, tunah hian an awmna khuate hian buhfai lamah harsatna an tawk \an niin kan Corr. chuan a sawi a ni. Sorkar chuan Hmawngbuchhuah pengah buhfai bag 100 a dah a, raltlante tan temporary ration card siam a nih hunah heng buhfaite hi sem a ni ang. Myanmar lamah chuan hel pawl leh sipaite inkap thawm a ri reng niin ramri depa chengte chuan an sawi a ni.
