Kum 2017 November thlaa Myanmar Army leh Arakan Army te inkahna avanga sahimna zawnga India ram chhung, Lawngtlai District ramri bul, Hmawngbuchhuah khua leh a chhehvela raltlan la chambangte hi Home Ministry thupek angin, Lawngtlai District Bawrhsap, Lawngtlai Police leh Assam Rifles ten an thawn kir tih sorkar thuchhuah in a sawi.
Kum 2017 buaina avang khan Myanmar rama Rakhine hnam mi 1200 vel chu ramri kanin Lawngtlai District chhunga khaw paliah an tlan lut a, sorkarin rei tak chhung District Administration kal tlangin a chhawmdawl a, an khaw hlui lama boruak a ralmuan hnuah a tam zawk chu a kir tawh a, let ve duh lova chambang chhungkaw 54-a mihring 219 an awm a ni. Home Ministry chuan heng mite hi thawn kir vek turin Mizoram sorkar a hriattir a, June ni 30, khan District Administration, District Police leh Assam Rifles te chuan Myanmar Sipai te nen Indo-Myanmar Flag Meeting neiin, Myanmar Sipai lam chuan raltlante hi an ram lama kir tura an pawm thu sawiin lo buaipui zui an tiam a, anmahni thawn kirna tur lawng pawh rawn tirh an tum thu an sawi a ni.
Myanmar Sipai te hian lawng hi an tirh leh si loh avangin Gypsy awm ang ang hmangin Laitlang thleng ral tlan te hi an thiar chhoh a. Sipai venna hnuaiah kein Border Pillar 8 thleng kalpuiin, ramri hi kan tir an ni a, ramri hi sipaiten an veng zui nghal a ni.
Raltlante hi an thawmhnaw leh bungrua an ken theih ang ang kentir an nih bakah, an ken theih bak chu lawng hmanga thiarsak an ni a, Chawlhkar hnih chhunga an ei tur an khuaah chhek khawl sak an ni a, thawn kir an nih hnu hian Hmawngbuchhuah-a an chen lailawkna in 54 te chu \hiah nghal vek a ni.
