Muzaffarpur shelter home-a hmeichhe naupang 34 te mipat hmeichhiat thila khawih chingpen an nih thu hriat chhuah a nih hnuah Bihar Chief Minister Nitish Kumar a’n an state chhunga shelter home zawng zawng state sorkarin a enkawl vek tawh dawn tih a sawi.

Patna-a chanchinbumite a kawmna ah Nitish Kumar chuan Shelter home reng reng NGO te kutah hlan a ni tawh dawn lo tih a sawi a, State sorkarin building mamawh te sa in a enkawl vek tawh dawn a ni a ti a, Muzaffarpur Shelter home-a naupang 34 khawih chingpenna-a inhnamhnawihte chu zuah an ni dawn lo a, Jail ah khung vek an ni ngei ang a ti. Muzaffarpur Shelter home-a thil thleng hi CBI te chuan an chhui mek a, Advocate General Lalit Kishore-a ngenna angin Patna High Court chuan CBI te thil chhui dan hi a vil zui tur thu a puang a, Patna High Court Chief Justice Rajendra Menon chuan CBI SP chu an thil chhuina kaihhnawih lehkhapawimawh te court a thehlut turin a hriattir a ni.