He dan hi Lok Sabha-ah pass anih hnuin Rajya Sabha ah a tan zui tak avang leh Lok Sabha thar din a nih tak avanga thi zui ta kha a ni a, eptu party ten dan hleih nei tak a ni tia an sawisel chu Sorkar lamin sawifiahin Supreme Court pawhin a lo khap tawh Tripple Talaq chu Dan hmanga nemngheh ngei a \ul a ni a ti a, kum 2017-a supreme court in a khap hnuah pawh tripple talaq vanga tuartu hi an la awm chhunzawm ngei tih Law Minister Ravi Shankar Prasad chuan a sawi a, Tripple Talaq khapna tur Dan thar, ‘The Muslim Women (Protection of Rights on Marriage) Bill, 2019 hi pass theih a nih chuan February thla-a BJP kaihhruai NDA sorkarin Ordinance hmanga he dan a lo hman lailawk tawh chu a thlak dawn a ni.
He bill sawihona-ah hian Congress hruaitu Shashi Tharoor chuan muslim mipa te chauh bitum lovin mi zawng zawng huap dan \ha zawk sorkarin a duang tur a ni a ti a, sakhaw dang betute zingah pawh mipa-in an nupuite an tlansan fo a, mumal tak leh huapzo taka duan anih theihna turin Parliament Standing Committee ngaihtuah tura chhawp chhuah phawt a \ul a ni a ti a, he dan hi pass ni mahse, Muslim hmeichhia te dinhmun a ti danglam chuang dawn lo a ni a ti.
Law Minister Ravi Shankar Prasad chuan he Dan hi hmeichhia te dikna chanvo humhalhna tur leh an dinhmun chawikanna tur Dan pawimawh a ni a, muslim hmeichhia te humhimna tur a ni a ti a, he dan hi sakhaw thil ni lovin hmeichhiate himna tura duan a ni a ti thung. Muslim pawl pakhat AIMIM hotu Asaduddin Owaisi chuan he dan hnuaia pasal zawk kum thum lung in tantira hrem theihna lai chu sawiselin, an nupui \hente chu tu in nge enkawl zui ta ang tih ngaihtuah a \ul a ni a ti a, dan hleihnei tak, a tum \helh tur a ni a ti.
