Hri leng kai hmuh chhuah tharte hian tun dinhmunah insawiselna leh harsatna an nei lo a, taksa-a hrileng lan chhuah dan ang, symptom pawh anmahni-ah a la lang chhuak lo a ni.
Tunkar Thawh\anni April ni 13 khan TATA Memorial Hospital-a inenkawl mek Mizo damlo chu COVID-19 a vei tih hmuhchhuah a nih tak avangin Brihanmumbai Municipal Corporation hmalaknain health lama thawktuten a vei hmuhchhuah tak, awmna Mizoram House dormitory-a awmte leh Cancer vei midangte sample 20 test turin an la a. Sample test result hi vawiin khan hriat a ni ta a, vanduaithlak takin mi pathumin an vei tih hmuhchhuah a ni. Coronavirus kai hmuh chhuahte hi COVID-19 enkawlna damdawi in Seven Hills Hospital-a dahluh turin vawiin tlai lam khan Ambulance hmanga phurh chhuah an ni.
Mumbai Mizoram House-a thlengte zinga sample la test loh te chu a rang thei ang bera test an ni ang a. Mumbai Mizoram House-ah hian cancer vei damlo 16 leh anmahni enkawltu 32, an vaiin mi 48, an awm mek a ni.
Health Minister Dr. R.Lalthangliana chuan vawiin khan Maharastra Sorkar Health Minister Rajesh Ankushrao Tope chu phone-a be nghalin mizo hri kai hmuhchhuah thar pathumte hi a rang thei ang bera buaipui turin a ngen a ni.
Health Minister Dr. R. Lalthangliana hian engvang chiahin nge Mumbai Mizoram House-a awmten he natna hi an kai tih hriat a ni lo tih a sawi a. A vei hmuhchhuah hmasak ber pawh a kaidarhtu a ni tih finfiahna engmah a awm lo a ni a ti a. Mi rilru ti na thei tur zawnga rinthu sawi lo turin mipuite a ngen a, COVID-19 vei te hming, thlalak leh an nihna tilang thei thil social media leh thildangah thehdarh lo turin mipuite a ngen a ni.
Mumbai Mizoram house-a COVID-19 kai hmuhchhuah hmasak ber pawh tun dinhmunah a \ha tih Health Minister hian a sawi a, a khawsik pawh damdawi in-a a luh hnuah a awm tawh rih lo a, a khuh pawh a zia bakah a awm pik te a zangkhai a, zan mut \hat theih loh pawh a nei rih lo a, ICU a dah ngai lovin General Ward ah enkawl mek a ni a ti a, a pasal chu a kai lo tih finfiah a nih hnuah, Salvation Army Red Shield hostel ah a awm mek a ni a ti.
Mumbai Mizoram house Deputy Resident Commissioner chuan Zonet zawhna chhangin, tun dinhmunah chuan Mizoram House-a awmten ei leh in lam kawngah harsatna nasa lutuk an la tawk rih lo tih a sawi a, an mamawhte chu telephone hmanga an order hnuah gate bul a\angin a la chhawng thei zel rih tih a sawi.
Mumbai Mizoram House atan hian in chhawng sang tak pakhat, Sun Tower-a a chhawng hnih luah a ni a, damlote awmna chhawng bikah pawh hian pindan \henkhat hnamdangin an luah a awm a, hetianga hnamdang nena inpawlh-a an awm avang hian in ngaihmawhna boruak a nasa chho \an hle a ni.
