Vawiina hri leng kai thar hmuh chhuah belh leh te hi cancer vei damlo pahnih leh damlo awmpuitu pakhat bakah House a thawk hnamdang pakhat a ni.
Healh Minister Dr. R.Lalthangliana sawidanin April ni 14-a House a awm mi 20 sample test result April ni 18 a hriat a nih khan COVID-19 positive pathum hmuh chhuah an ni a, April ni 18 khan la test ve loh ho zawng Mizoram House a thawkte telin mi 35 sample test leh a ni a, an test result hi a negative vek a. Pathianni khan a hma, April ni 14 a sample test zinga negative ho mi 17 bakah House a thawk hnamdang la test ve loh te chu sample lak leh a ni a, tukin khan an result hi hriat a ni a, an zinga mi pali – cancer vei pahnih leh damlo awmpuitu pakhat bakah House a thawk hnamdang mi pakhatin COVID-19 hi an kai tih hmuh chhuah a ni. Vawiina hri leng kai hmuh chhuah zinga mi, damlo awmpuitu pakhatin a awmpui, cancer vei chu test a negative thung a ni.
Health Minister Dr R Lalthangliana hian Mizoram House a awm leh thawktute zinga COVID-19 natna vei hmuhchhuah tawh zat chu pariat an ni ta tih a sawi a, enkawlna tha tak an dawn ngei tur thu a sawi.
Cancer vei COVID-19 positive pahnihte hi COVID-19 natna veite enkawlna tur bika siam damdawi in “Seven Hills Hospital” ah dah luh nghal an ni a, midang pahnih erawh chu Quarantine Facility ah dah rih an ni.
Health Minister Dr R Lalthangliana hian COVID-19 veite hming, thlalak leh nihna tarlang thei thil reng reng social media leh thildanga puangzar lo turin mipuite a ngen a ni.
