Thingtlang lama eirawngbawlna gas harsatna sukiang turin Mualkhang Gas Bottling Plant atanga carrying contractor te gas phurh chhuahna rate ennawn turin Indian Oil Corporation hotute ngen mek an nih thu Food, Civil Supplies & Consumer Affairs Secretary, Pu HL Rochungnunga’n a sawi.
ZONET zawhna chhangin Food, Civil Supplies & Consumer Affairs Secretary chuan tun hnai khan a office-ah hemi chungchang hi IOC hotute leh Mualkhang Gas Bottling Plant hotute nen an sawiho tawh niin a sawi a, hetah hian Mualkhang Gas Bottling Plant atanga Aizawl khawpui pawna sem chhuah tur eirawngbawlna gas phurtu, carrying contractor pathum ten tender an chhan laia rate hniam lutuka an chhan avanga an rate anga an phurh leh theih si loh thu te, hemi avanga thingtlang lama harsatna a thlen dan te sawi chhuakin IOC hotute chu Mualkhang Gas Bottling Plant atanga gas sem darhtu tur carrying contractor lak thar leh nan tender chhuah leh tura ngen an ni a, an ngenna chu IOC hotute chuan lo enzui an tum thu an sawi a, an thutlukna siam chu karleh lamah hriat theih a beiseiawm niin a sawi. Puan tawh angin Aizawl khawpui pawn lam Zoram hmun hrang hranga eirawngbawlna gas sem tur contractor pathumin an phurh chhuahna rate hman mek chu kilometer 1 zelah cylinder pakhatah pawisa 12.83 a ni a, hei hi hemi hmalama IOC rate hmanlai km 1 zela cylinder pakhat phurh man pawisa 17.55 aiin nasa taka a tlem avangin a phurtu Silchar mi Contractor 3, Kamal Bharbuiah, Anil Kumar Shetty leh Biren Singha te chuan an phur chhunzawm tha thei lova, hei hian harsatna nasa tak a thlen mek a ni. He rate tidanglam tur hian IOC-in tender a chhuah thar leh a nih loh chuan he rate ang hian Contractor awmlai ten kum hnih deuh thaw chhung an phurh zui a ngai dawn a ni.
Hetihlai hian Serchhip District-a eirawngbawlna gas harsat vanga tuartu mipuite thlavang hauh nan vawiin khan Serchhip MNF East Block huaihawtin Serchhip AOC Veng atanga Serchhip Bazar thleng kawngzawh a ni. Kawngzawhtute hian ‘eirawngbawlna gas pe thei lo Congress sorkar bang rawh se’ tih te, Serchhip bial mipuite ngaihthaha an bialtu Chief Minister, Pu Lal Thanhawla an puhna te an auchhuahpui a ni. Kawngzawh hi MNF East Block Secretary, Pu B. Lalmuanpuia’n a kaihruai a, AOC kawna inkhawmah Block Vice President, Pu C. Vanlalsiamthara chuan thusawiin, eirawngbawlna gas harsat vanga kawngzawh ngai chu vanduaithlak a tih thu a sawi a, nikum April atanga kumin January thla thleng khan Serchhipah eirawngbawlna gas trip 14 chauh a thleng a, hei hian mipuite mamawh a phuhru pha lo hle niin a sawi. He inkhawmah hian MNYF Vice President, Pu H. Ramdinliana pawhin thusawiin MNF sorkar laiin hnianghnar takin mipuiten eirawngbawlna gas an hmu niin a sawi a, tuna eirawngbawlna gas harsatna sutkian nan tender chhuah nawn leh chu thil tul niin a sawi a, sorkarin a phurh man atan Rs.10,00,000/- a pek belh tawh thu leh tunah hian Rs.15,00,000/- dang pek leh rawtna file pawh a kal mek niin a sawi a, hei hi Contractor duhsakna niin a sawi bawk. Kawngzawh tawpna hmun Bazar-a inkhawmah East Block President, Pu T. Zadingliana’n thu a sawi a ni.
