Chawngtea tlawmngai pawl hrang hrang 8-in vawiin khan Chawngte Police Station-ah FIR thehlutin, tun thla ni 27-a Govt. Kamlanagar College-a kal, MSU hruaitute kut lo thlaktute chu ni hnih chhunga man chhuak turin an ngen. Heng pawl hrang hrang 8 FIR thehluttute hi Chawngte MSU Sub Hqrs. President, Vanlalropuia, Chawngte Group YMA President, B. Lalengzuala, Chawngte Joint YMA President, Lalsailova Hrahsel, Chawngte P Branch YMA President, C. Lalhmunmawia, Chawngte L Branch YMA President, PC Lalramnghaka, Chawngte P YLA Branch Secretary, Omeg Lalramkinlova, Chawngte Joint Action Committee Chairman, ZD Ramngamzauva leh Chawngte MZP Sub Hqrs. President, Gospel Vanlalrinchhana te an ni a, an FIR thehluhah chuan hemi nia Kamlanagar College-a kal, MSU hruaitu kut lo thlaktute chu College staff pakhat, College zirlaite leh pawn lam mi engemawzat niin an sawi a ni.
Govt. Kamlanagar Students Union General Secretary, Ashim Chakma chuan vawiin vek khan thuchhuah siamin, Kamlanagar College-a he thil thleng leh hemi hnua Chawngte Sub Hqrs. MSU-te thuchhuah chungchang a sawifiah a, hemi ni hian mi \henkhat, MSU hruaitu nia insawite chu College-ah kalin College zirlai, exam bei turte chu an class room-a luh phal lovin an lo dang a, College gate kawngkapui pawh khar an tum a, College zirlaite chuan chutianga an tihna chhan chu zawtin, College hotute an hriattir hmasa em tih an zawt bawk a, MSU President nia inchhal chuan zirlaite chuan chutiang zawh a thiang lo tih sawiin, College kal tur zirlaite chu tharum hmangin a nawr a, zirlai, exam bei turte chuan an exam tur chu an ngaih pawimawh avangin class-a luh an tum a, hetih lai tak hian Police an thlen hman avangin boruak chu an thunun zui ta niin a sawi. Hemi hnu hian SDO Civil, SDPO, OC leh zirtirtute pawhin College hi an thleng a, hemi hnu hian he thila buaina hi chin fel zui a ni ta niin a sawi a ni. Govt. Kamlanagar College Students Union chuan Chawngte Sub Hqrs. MSU hruaitute chunga kut thlak anga thuthang awm chu thudik lo niin an sawi bawk.
