Vawiina Lungleia Congress Party pisa hawnna inkhawm a hmanpuinaah Assembly-a opposition group leader nibawk Pu Mama hian, Chief Minister Pu Zoramthanga’n inthlan dawnah intiamna a nei nual a, kawng chhawng, nuai thum sem leh Aizawl chu traffic jam awm lohna khawpui awm chhuna siam chu a langsar zual a ni a ti a, kum khat an sorkar hnuah pawh kawng chhawng atan ban pakhat pawh phun a la ni lo a, cheng nuai thum sem intiam siin cheng khat pawh an la sem lo a, traffic jam awm lohna siam an tum Aizawlah traffic a jam nasa telh telh zawk a ni a ti a, heng thil hrang hrangte hi kum khat chhunga ti-hlawhtling nghal turin beisei lo mahse, kum khat chhunga hmalakna pakhat mah a awm lo erawh a mak hle a ni, a ti.
Pu Mama hian, MNF sorkar-in zu zawrh a ti tawp a, kawng dangin zawrh a tum leh mek niin a sawi bawk a, an intiam zingah zu zawrh titawp mah se, beng muka liam zawih zawih a\angin pawisa thal tur a hmu ta lo a nih hmel a, an pawisa nei lo, thil tiam ngah bawk siin, sum hmuh nan zu zawrh lam an hawi leh mek a ni a ti a, CAB an dodal tur thu sawi chungin an thlawp leh tho tih a sawi bawk.
MNF sorkar Flagship Programme, SEDP chu a duang chhuaktu ber Health Minister, Pu Thangtea pawhin a sawi khat ta hle tih sawiin, tun hnai deuh khan Agricultur Department-in SEDP sum an neih hman dan tur an sawi ho a, Department dang erawh thehhmeh ang \hiapin an la ngawi a ni a ti a, SEDP sum pekchhuah dan chu chiang zawka sawifiah turin sorkar a phut tih Pu Mama hian a sawi.
