Vawiina Aizawl Press Club-a thuthar lakhawmtute an kawmnaa zawhna chhangin he thu hi a sawi a, kumina Mizoramin Assembly inthlanpui a hmachhawn turah mipuiten kum danga an la hriat tak tak ngai loh chimtu a awm nia sawiin, hei hi Mizo kristiante tana hlauhawm tak BJP a ni, a ti a. Tuna a lan danah chuan BJP hian inthlanah chak an tum lutuk lova, inthlan zawh hnu lamah sorkar kaihruai tura \anlak an tum tih chu an hmuh dan a nih thu a sawi.
Pu H. Liansailova chuan, BJP hian an mahni ni kher lo tualchhung Political party hmanga bu an khuar chuan Mizoram leh mipuite tan kum khaw chawr lohna a nih theih dawn avangin mipuite an fimkhur a \ul hle a ni, a ti a. Chakma District Council-a BJP nen an thawh ho chungchang zawhna chhangin, he thawh hona hi CADC Area-a an inremna mai a nih thu leh an hotu lawkten an hriat loh thu a sawi a, tunah hian CADC-a an hotuten BJP nena an thawh hona chu sut turin an buaipui mek niin a sawi.
Pu H. Liansailova chuan, an party-in Policy an tarchhuahte chu mipuite hnena zawrh tla tura, thiam taka sawi mawi lam aiin, mipuite tan enge an tih theih tih chu an ngaih pawimawh ber a ni tih a sawi a. An party-in mi harsa zawkte chhawmdawl tura NLUP leh NEDP a duan chu kalpui chhunzawm zel a ni dawn tih a sawi.
Planning Minister nilai, Congress hruaitu dang Pu Lalsawta pawhin, \halaite hmasawn tura \an an lak meknaah an thiamna leh theihna pholang tura hmanraw changkang ber ber ngaihtuah sak chhoh zel an tum thu a sawi a. Hriselna kawnga hmathar lak turah tuna sorkar laipuiin Health Care Scheme thar a buatsaih chu changtlung taka kalpui a, a inziahluhna tur nei lote tan pawh a theih ang anga sum ngaihtuah sak an tum tih a sawi a, Finance Commission 15-na hmachhawn avanga sorkar tana tih remchang rih lo \henkhat, sorkar hnathawk hlawhbi buai leh Police leh Department dang danga thawktute chanvo hmuh rih lohte pawh ngaihtuah sak an tum tih Pu Lalsawta chuan a sawi bawk.
