Vawiina an pawl hruaitu thar thlan hmaa inkhawm tawi neihah Chief Minister hlui Pu Lal Thanhawla hian, tun ang reng renga ram hruaitu, eiruk thubuai nei lian Mizoramin a la nei ngai lo niin a sawi a. MNF sorkar hotu lian zinga pahnihin eiruk thubuai lian tak an nei a, an thubuai neihte hi finfiahna engkim awmsa a nih avangin court-in a chinfel rual rual-a jail tang mai tur an ni, a ti.
Pu Lal Thanhawla chuan, MNF sorkar hmasa-in finfiahna awm lovin thubuai an siamsak nia sawiin, jail-a tan tir tumin kum 10 chhung zet amah chu an bei niin a sawi a, jail tang tur anga sawiin, Jail-ah chaw an chhum kep tawh te an ti a, chutianga kum 10 zet an veh chung pawhin a eiruk pakhat pawh an hre lo niin a sawi a, Chief Minister nilai Pu Zoramthanga erawh chu thuneituten an hrilhru lawk vek chung pawhin ACB-in tangkafai cheng vaibelchhe 9 leh nuai 60 zet an man sak niin a sawi a, court-in dik taka ro a rel a nih chuan jail tang mai tur a ni, a ti.
Mizoram Congress chu Central-a an Party hruaitute lakah an la innghat ngai lo nia sawiin, Pu Lal Thanhawla hian, engkim tithei Pathianah bak an innghat ngai lo a, mi\henkhatin Congress chu Central lamah an tlachhe nasa a, Mizoramah pawh an dingchhuak tawh mai mai lo ang an ti chu thu belhchian dawl lo a ni a ti a, Pathian hriatpui programme hmangin Mizoram hmasawnna hna an thawk chhunzawm leh ngei dawn tih a sawi.
He inkhawm hi Vice President kalchhuak, Pu C.L. Ruala, Lok Sabha member hluiin a kaihruai a ni.
