Vawiina an party Political session-ah thu sawiin Pu Hawla hian, ILP chu BJP-in hnawk an ti hle tih a sawi a, India mi tam takin hnawk an tih ILP chu innghahna atana hman tlak a ni lo thuai dawn niin a sawi a, BJP sorkarin Hindu lal ram din an tumna kal zelah an hmachhawp tam tak an ti hlawhtling tawh a, an duh anga Mizoram an khawih ve theih lohna, inhungbing na ILP chu hnawk an ti hle tih a sawi a, zawlnei ni lo mahse BJP chuan ILP \hiah chu an la tum ngei dawn a ni a ti.
MPCC Legal Adviser Pu RC Thanga pawhin thusawiin CAA chungchangah MNF sorkarin Mizoramah hman a ni dawn lo tia mipui an hrilh chu thu dik chanve a ni a ti a, CAA dan pumpui ni lovin, CAA chhunga section pathumna chauh a nih thu a sawi a, CAA hnuaiah section 6 a awm thu sawiin section 2-naah chuan mi tupawh, Hindu, Sikh, Buddhist, Jain, parsi, Kristian-te Afghanistan, Bangladesh leh Pakistan a\ang emawa kum 2014 December ni 31, hma lama Mizorama lo lut, kum 5 aia tlem lo India rama lo awm tawhte chu danin a phuar lo ang a, chung mite chu dan loa India rama lo lut anga chhiar an ni lo ang’ tih a ni tih sawiin hetah hian tihduhdahna vanga lo lut tih lam a awm loh thu a sawi a, hetihlai hian section 3-nain Mizoram leh Tribal area-ah ILP hmanaahte hman loh tur tih ni mahse section 2-nain heng lo pem lutte hi dan bawhchhia an ni lo a tih vek tawh si avangin section 3 na hian awmzia a nei ta lo a ni a ti.
Pu RC Thanga chuan, CAA dan chu section 3-na tih chauh loh chu Mizoramah hman tur a ni tih a sawi chiang nia sawiin Mizoram a foreigner kum 5 lo awm tawhte chu dan anga khawsaa ngaih tur an nih avangin hnawhchhuah theih an ni tawh lova, khua leh tui nihna pek theih lohna dan engmah tarlan a nih loh avangin awlsam takin khua leh tui nihna an nei dawn tho a ni a ti.
