Vawiina Congress Bhavan inkhawmah thu sawiin, Pu Lal Thanhawla chuan ram kaihhruai mawhphurhna an kuta hlan a nih apiangin MNF chuan ram an tichhe leh zel niin a sawi a, mipuiten hun \ha an pe chhungin MNF sorkar chuan ram leh hnam tana rotling hnutchhiah an la nei ngai lo mai ni lovin, a awmsa tihchhiat bak engmah an nei lo a ni a ti a. Hming phuah thiam ringawt chu changkanna a ni lova, a hming an phuah leh a putu chu a inmil tur a ni a, tlang bawk pakhatah Capital Complex a leng lo hrim hrim a, New Secretariat Complex tih chu a inhmeh em em zawk a ni, a ti.
Pu Lal Thanhawla chuan Mizoram Medical College hmasa ber MIMER chu an hotuten thil thui tak ngaihtuah chunga an sak a ni tih sawiin, MBBS bakah thiamna sang zawk zirna in a nih theih nan din a ni a. Zoramthanga College tia thlak chi a ni lo a, Mizoram hming pua an phuah duh a nih chuan Mizoram Medical College ti law law se, chu chu India rama mi zawng zawngin an hrethiam dawn a, Zorama Medical College an tih chuan mahni thil tuma hlawhchham lailet der, a dote kuta inpe tih leh Rs. vch. 9 leh nuai 80 chuang eiruk thubuai nei tih bak miin an hriat dawn loh avangin, miin awmze nei taka hma an lo lak tawhna, a \hat zawk dawn vang pawh ni lova thawk leh khata inthlak sak ngawt chu a intham loh thlak hle a ni, a ti.
MPCC President, chuan thuneihna an chan laia zu zawrh phalna an pechhuak chu zu an fak vang emaw \ha an tih vang emaw a ni lo tih sawiin, Mizote chu zu buaipui lo hnam an nih theih nana he thutlukna hi siam an ni tih a sawi a. Zu zawrh chu Congress sorkar tlak chhan pawh ni se, dik leh \ha nia an hriat an tlakpui chu na an ti lova, dik leh \ha nia an hriat tlakpui theia an awm chu thil lawmawm tak a ni zawk a ti bawk.
He inkhawm hi MPCC General Secretary, Pu PB. Lalsawmliana’n a kaihruai a, Lok Sabha member ni lai Pu CL Ruala pawhin thu a sawi a ni.
