Vawiina Congress Bhavan-a inkhawmah Pu Lal Thanhawla chuan, MNF President, Chief Minister Pu Zoramthanga’n Central lamah pawia a tam thu a sawi mek lai leh, a thal thiam leh ngaihna hria tan chuan Tuikhura tui luanglut, a lehlama luangchhuak leh zur zur ang nia a sawi laia Mizorama Treasury hrang hrangten sorkar hnathawk hlawh bak an pechhuak thei lo leh Contractor-te Bill pawh an pe thei lo chu thil inhmeh lo tak a ni, a ti a, hei hian sum enkawl an thiam lo tih a tilang chiang hle a, tunah hian an talbuai mek a, rei lote hnuah an inpaltlu mai lovang tih a sawi theih loh a, lung ina tang an awm zeuh zeuh phei chuan an buai viau dawn tih a sawi.
Pu Lal Thanhawla chuan, Mizorama hmasawnnna ruhrel lian zawng zawng chu Congress kaihhurai sorkar din deuh vek nia sawiin, chhunzawm thei turin an party chu tum ruhna nena an inbuatsaih a ngai tih a sawi a, hun lo kal zel turah Zoram tan malsawmna ni turin, nuihza siam nan lo hmang tawh suh u tih ngai loa taimakna nen kal zel turin an Party mite chu a chah a ni.
Medical College hming thlak chungchangah Pu Lal Thanhawla hian Congress Sorkar din a nih avangin an sorkar leh hun hunah an duh angin an la tidanglam leh dawn tih a sawi.
