Ram ri chungchangah sorkarin ngawih a chuh tlat nia sawiin, a ngaihthat thlak loh hle tih MPC President Pu Lalhmangaiha Sailo in a sawi. He thu hi vawiina an party pisaa Executive Meeting an neihah a sawi a, ramri a him tawk lo nia sawiin, sorkarna an chan chuan Mizoram ram ri dik tak nei let leh turin theih tawp an chhuah dawn tih a sawi. Pu Lalhmangaiha Sailo chuan, kum 30 chhung ram enkawltu ten Mizoram intodelh nan leilung hausakna haichhuah kawngah hma an la chak lo hle niin a sawi bawk a, Cachar Paper Mill in Mizoram mau tlawm taka leiin hausak nan a hmang mek tih sawiin an party in thuneihna an chan chuan hei hi titawpin Mizoramah ngei Paper Mill an bun dawn niin a sawi bawk. Executive Meeting hian resolution siamin Kum 30 chuang Mizorama thuneihna changtuten ramri hung chungchangah hmalakna tluantling an nei lo niin an tarlang a, YMA in dan hmanga CADC thiat tura hma a lakna chu an thlawp thu te, Mizoram leh Assam ramri chungchangah Bengal Eastern Frontier Regulation Act 1875-a tarlan chu an party pawm dan a la nih reng thu te, Sorkar chuan ramri chungchangah hmalakna mumal a neih loh avangin buaina a thleng fo nia an hriat thu leh Mizoram pawh a zim phah zel nia an ngaih thu te an tarlang a ni.
